विधिमंडळाच्या आवारातून विधान परिषदेच्या उपसभापती नीलम गोऱ्हे जात होत्या. त्यावेळी त्यांच्यासोबत त्यांचे सुरक्षा रक्षक होते. यातील एकानं धक्का दिल्याचं शिवसेना उबाठाचे आमदार आमदार सरदेसाई यांनी सांगितलं. धक्का लागल्यामुळे सरदेसाई प्रचंड भडकलेले दिसले. ‘मॅडम येताना मला दुसऱ्यांदा धक्के बसलेत. इथे काय अतिरेकी घुसलेत का? दुसऱ्यांदा हा प्रकार घडतोय,’ असं सरदेसाई तावातावानं बोलत होते.
ठाकरेंच्या एकीचं बळ, शिंदेसेनेत खळबळ; शह देण्यासाठी ‘ऑपरेशन’ सुरु, लवकरच मोठा भूकंप?
सरदेसाई यांचा पारा चढलेला पाहून गोऱ्हे यांनी त्यांच्या सुरक्षा रक्षकाकडे तुम्ही कोणाला काही केलंय का, तुम्ही कोणाला हात लावला का, असी विचारणा केली. त्यावर मॅडम येताना मला दुसऱ्यांदा धक्के बसलेत, असं सरदेसाई म्हणाले. त्यावर त्यावेळी हा माणूस नव्हता, असं म्हणत गोऱ्हेंनी विषय संपवण्याचा प्रयत्न केला. त्यानं मुद्दामहून नाही केलं, असंही गोऱ्हे म्हणाल्या. तेव्हा सारखे कसे काय धक्के लागतात, असा प्रश्न सरदेसाई यांनी विचारला. त्यावर मुद्दाम धक्का लागलेला नाही. तरीही नम्रपणे तुमच्याशी बोलत असताना तुम्ही असं बोलता, ही कोणती तुमची संस्कृती?, असा सवाल करत गोऱ्हे तिथून निघून गेल्या.

या प्रकारानंतर सरदेसाई यांनी माध्यमांशी संवाद साधताना घडलेल्या घटनेबद्दल संताप व्यक्त केला. ‘हे लोक स्वत:ला व्हिआयपी समजतात. जास्त लोकांना आत घेऊन यायचं नाही, असं एका बाजूला आम्हाला सांगितलं जातं. गोऱ्हे उपसभापती आहेत. मी त्यांच्या पदाचा मान राखतो. पण प्रत्येकवेळी धक्काबुक्की कशी होते? गेल्यावेळीही धक्काबुक्की झाली होती. इथे आम्ही नाही चालणार तर कोण चालणार? मागील अधिवेशनावेळीही असाच प्रकार घडला होता,’ असा दावा त्यांनी केला.

यांचे बॉडीगार्ड कोण आहेत? उद्या आम्ही हात सोडले तर का होईल? या सभागृहात आमदारांचा यथोचित मान राखायला हवा. आम्ही आमदार बिल्ले का लावतो? एखाद्यानं आम्हाला ओळखलं नाही तर त्यांना समजावं यासाठी बिल्ले लावतो. तरीही धक्के मारले जाणार असतील तर काय अर्थ आहे, असा सवाल त्यांनी विचारला. गोऱ्हे यांच्यासाठी वेगळी बस काढा. त्यांच्यासाठी विधिमंडळाच्या टेरेसवर थेट विमान उतरवा,
असं सरदेसाई खोचकपणे म्हणाले. कोणीही सोमेगोमे येतात, धक्के देतात. ही फालतुगिरी बंद झाली पाहिजे, असं सरदेसाई यांनी म्हटलं.