पोलिसांनी माहितीनुसार, महाबळेश्वर येथील हॉटेल ऑक्सिजनमधील इलेक्ट्रॉनिक वस्तू, फर्निचर, भांडी असे १० लाख रुपये किंमतीचे महागडे साहित्याची २५ जून ते २८ जूनच्या दरम्यान चोरी झाली होती. पोलीस अधीक्षक तुषार दोषी (एलसीबी) यांनी सूत्र फिरवत पोलीस निरीक्षक अरुण देवकर आणि महाबळेश्वरचे पोलीस निरीक्षक बापूसाहेब सांडभोर यांना सूचना दिल्या. त्यानुसार उपनिरीक्षकांचे पथक नेमण्यात आले.

तपास पथकाने घटनास्थळी जाऊन चौकशी आणि तांत्रिक माहिती गोळा केल्यानंतर हॉटेलमध्ये काम करणाऱ्या एका कामगाराने चोरी केल्याचे समोर आले. पोलीस आरोपीच्या ठावठिकाण्याची माहिती मिळवत असतानाच एलसीबीचे पोलीस निरीक्षक अरुण देवकर यांना मुख्य आरोपी हा दुबईला पळून जाणार असल्याची गोपनीय माहिती मिळाली होती. त्याप्रमाणे त्यांनी तपास पथक तात्काळ मुंबई विमानतळावर पाठवले.

तपास पथकाने छत्रपती शिवाजी महाराज आंतरराष्ट्रीय विमानतळावर जाऊन सहार पोलिसांची मदत घेतली. संशयित आरोपी विमानतळावर ‘चेक इन’ करीत असतानाच सातारा पोलिसांनी त्याच्या मुसक्या आवळल्या. त्याने चोरीची कबुली देऊन साहित्य साताऱ्यातील भंगार व्यावसायिकास विकल्याचे सांगितले. चोरीप्रकरणात सहकार्य करणाऱ्या दोन भंगार व्यावसायिक साथीदारांनाही चोरीच्या गुन्ह्यात अटक केली. त्यांच्या भंगार गोडावूनमधून १० लाख रुपये किंमतीचे साहित्य जप्त केले. साहित्य आणण्यासाठी वापरलेला ट्रक आणि टेम्पो, असा एकूण १७ लाख ९० हजार रुपये किमतीचा मुद्देमाल हस्तगत केला आहे.