सजग नागरिक मंचचे अध्यक्ष विवेक वेलणकर यांनी स्टेट बँक ऑफ इंडियाला बँकेचा समभागधारक म्हणून सर्वसाधारण सभेच्या निमित्ताने बड्या कर्ज थकबाकीदारांची थकबाकी वसुली, निर्लेखित (राइट्स ऑफ), कर्ज वसुली करताना सोसलेला ‘हेअरकट’ यासंबंधीची माहिती मागितली होती. या माहितीच्या उत्तरात त्यांना ही माहिती देण्यात आली. स्टेट बँकेने गेल्या नऊ वर्षांत बड्या कर्जथकबाकीदारांची (१०० कोटींपेक्षा जास्त रकमेचे कर्ज थकबाकीदार) एक लाख ४९ हजार १६७ कोटी रुपयांची कर्जे निर्लेखित केली असून, त्यातील फक्त १६ टक्के कर्जाची म्हणजेच २३ हजार ८३९ कोटी रुपयांची आजवर वसुली होऊ शकली आहे. मात्र, या बड्या कर्जदारांची नावे देण्यास बँकेने नकार दिला आहे. याच बँकेने वेलणकर यांना २०२० मध्ये समभागधारक म्हणून ही नावे दिली होती.
Savings Bank Account: तुमचंही ‘या’ बँकांमध्ये खातं आहे का? आता मिनिमम बॅलन्स ठेवण्याची गरज नाही, बदलले नियम
‘छोट्या कर्ज थकबाकीकरांचे नाव पत्त्यासह वर्तमानपत्रात जाहिर करून त्यांची घरेदारे विकून कर्जवसूली करताना तत्परता दाखवणाऱ्या बँका बड्या कर्जदारांबाबत बोट चेपी भूमिका घेतात आणि कोट्यावधी रुपयांवर पाणी सोडतात. यात भारतीय रिझर्व्ह बँक (आरबीआय) आणी अर्थ मंत्रालय बघ्याची भूमिका घेते हे दुर्दैवी आहे,’ असे सजग नागरी मंचाचे अध्यक्ष, विवेक वेळणकरांनी सांगितले.

आठ वर्षात २७९ कर्ज प्रकरणे निकाली

गेल्या आठ वर्षांत कोणती कर्जे बँकेने ‘एनसीएलटी’मध्ये तोटा सोसून (हेअरकट घेऊन) निकालात काढली, त्यांची यादी आणि किती ‘हेअरकट’ घेतला, त्याची माहिती मागविली होती. ही माहिती देताना बँकेने सांगितले, की गेल्या आठ वर्षांत ‘एनसीएलटी’मध्ये एक लाख ४४ हजार ९६७ कोटी रुपयांची २७९ कर्जप्रकरणे निकाली निघाली, ज्यात बँकेला ६७ टक्के रकमेवर म्हणजेच ९६ हजार ५८८ कोटी रुपयांवर पाणी सोडावे लागले. मात्र, कोणत्या कर्जदारांची प्रकरणे ‘हेअरकट’ घेऊन निकाली काढली, त्यांची नावे द्यायला बँकेने नकार दिला.