भटउमरा गावातील जिल्हा परिषद शाळेतील वर्गात तास सुरू होता अचानक एका कोपऱ्यातील स्लॅबचा भाग कोसळला. तेथे बसलेल्या विद्यार्थ्यावर त्या भागाचे तुकडे पडले ज्यात तेथे बाकावर बसलेला विद्यार्थी गंभीर जखमी झाला. त्या विद्यार्थ्याच्या डोक्याला मार लागला. उपचारासाठी त्याला तात्काळ जवळच्या दवाखान्यात नेण्यात आले. शिवाजी उमाळे विद्यार्थ्याचे नाव असून तो सातवी इयत्तेत शिकत आहे. या घटनेने शाळेतील विद्यार्थी भयभीत झाले आहेत. तसेच पालकांनाही पाल्याबद्दलची चिंता वाढली आहे. शाळेची इमारत दहा वर्षापूर्वीच बांधण्यात आली होती.

या दुर्घटनेनंतरचा व्हिडिओ समोर येत आहे. त्यात दिसून येते की स्लॅबच्या प्लास्टरचा मोठा भाग खाली कोसळला असून. वर्गातील बॅंचवर बॅगवर त्याचे तुकडे पडले आहेत तसेच वर्गात मोठ्या प्रमाणात सिमेंटचे तुकडे पडल्याचे दिसत आहेत.

राज्यातील जिल्हा परिषदेच्या अनेक शाळांची दुरावस्था समोर आली आहे. गावागावात जिल्हा परिषदेच्या शाळा आहेत पण त्यातील काही शाळांची दुरावस्था ही भीषण आहे. पावसाळ्यात अनेक शाळांमध्ये छत गळत असल्याचेही समोर येते. कोल्हापूरमधील शिये गावातील एका कन्याशाळेची अवस्थाही भयानक होती.कौल फुटली होती. इमारतीच्या काही भागाची पडझड झाली होती. अखेर त्या शाळेतील विद्यार्थ्यांना दुसरीकडे हलवण्यात आले होते. नगरपालिकेच्या शाळेतही दुरावस्था समोर आली आहे. काचा फुटल्या आहे. भिंतींना भेगा पडल्या आहे. शाळेतील स्वच्छतागृहांची अवस्था ही भीषण आहे. वाशिममधील घटनेने अशा शाळांच्या दुरावस्थेचा प्रश्न ऐरणीवर आला आहे. पालकांकडून अशा शाळांबाबत सरकारने तातडीने उपाययोजना करण्याची मागणी केली जात आहे.