1 एप्रिल 2019 पूर्वीच्या सर्व जुन्या वाहनांना ‘एचएसआरपी’ लावणे बंधनकारक करण्यात आले आहे. 1 जानेवारी 2025 पासून ही नवी नंबर प्लेट लावण्याची मोहीम हाती घेण्यात आली. सुरुवातीला 31 मार्च आणि नंतर 30 जूनपर्यंत अशी दोनदा मुदतवाढ देण्यात आली; परंतु सहा महिन्यांचा कालावधी होऊनही फारसा प्रतिसाद मिळत नसल्याचे चित्र आहे.

आता पुन्हा ही मुदत वाढविण्यात आली आहे. आता 15 ऑगस्ट 2025 शेवटची तारीख आहे. मात्र नंबरप्लेट बसविण्यासाठीच्या अनेक तांत्रिक अडचणी येत असल्याने नंबर प्लेट बसवून घेणाऱ्यांची संख्या तुलनेने खूपच कमी आहे. नागपूर जिल्ह्यातील तीन आरटीओ कार्यालयांतर्गत 22 लाख 34 हजार वाहनांना ‘एचएसआरपी’ बसविण्याची गरज आहे. मात्र आतापर्यंत केवळ 5 ते 6 टक्केच नंबर प्लेट बसवून झाल्या आहेत.

थोडक्यात बचावले

नवीन नंबर प्लेटसाठी गुगलवर एचएसआरपी टाइप केल्यानंतर hsrpservice.online, hsrp-India.org, hsrponline.org.in, hsrpbookingindia.org अशा संकेतस्थळांची यादी दिसली. या साइटवर गेल्यानंतर राज्य निवडले. शहर असा पर्याय येण्यापूर्वीच पैसे भरण्याची लिंक आली. काही गडबड आहे, असा संशय आल्याने मी पैसे भरले नाही, असा अनुभव विभा बोरकर यांनी सांगितला.

पैसे घेऊन साध्या नंबर प्लेट दिल्या

अधिकृत संकेतस्थळावर न जाता अनेक जण बोगस संकेतस्थळावर जात आहेत. दुचाकीसाठी काहींनी 531 ऐवजी 900 रुपये भरले. कारसाठी काहींनी तर बाराशे रुपयांपेक्षा अधिक रुपये भरले. आमच्याकडे तोंडी तक्रारी प्राप्त होत आहेत. मात्र मोठी फसवणूक नसल्याने लेखी तक्रार करायला कोणी पुढे येत नाही. नागरिकांनी सतर्क राहून अधिकृत संकेतस्थळावरच नोंदणी करावी, असे आवाहन प्रादेशिक परिवहन अधिकारी (ग्रामीण) विजय चव्हाण यांनी केले.

अधिकृत प्रक्रिया अशी

https://transport.maharashtra.gov.in या संकेतस्थळावर गेल्यानंतर अप्लाय एचएसआरपी वर क्लिक करा. झोनची निवड करून ऑर्डर एचएस आरपी वर क्लिक केल्यानंतर वाहनाची माहिती टाका. त्यानंतर शुल्क भरून जवळचे केंद्र निवडा, असे प्रशासनाकडून सांगण्यात आले.
Rene Joshilda : अहमदाबाद विमान अपघात माझ्यामुळे, प्रपोजल नाकारल्यामुळे सुडाने पेटलेल्या तरुणीचा ईमेल, चक्रावणारी कहाणी समोर

असे आकारले जातात शुल्क

वाहन : जीएसटी सह शुल्क
दुचाकी : 531
कार : 879
ऑटोरिक्षा : 590

या अडचणी कायमच

महाराष्ट्रात रोस्मार्टा सेफ्टी सिस्टिम लिमिटेड, रियल मॅझॉन इंडिया लिमिटेड आणि एफटीए एचएसआरपी सोल्युशन प्रा. लिमिटेड या तीन कंपन्यांना याचे कंत्राट देण्यात आले आहे. महाराष्ट्रात कुठल्याही केंद्रांवर यासाठी नोंदणी करता येते, असा दावा परिवहन कार्यालयाकडून करण्यात येत असला तरी यात अनेक त्रुट्या आहेत.
Pune Crime : 30 वर्षीय पत्नीचे 55 वर्षीय प्रियकराशी अनैतिक संबंध, नवऱ्याने रंगेहाथ पकडून दोघांना संपवलं, पुण्यात तळवडे IT पार्क हादरला

15 ऑगस्टनंतर दंडात्मक कारवाई

परिवहन विभागाने काढलेल्या पत्रात नमूद केले आहे की, 15 ऑगस्ट 2025 पर्यंत ज्यांनी ‘एचएसआरपी लावले नाही त्यांच्यावर कारवाई केली जाईल. मात्र, ज्यांना 15 ऑगस्टनंतरची एचएसआरपी बसविण्याची अपॉइंटमेंट मिळाली असेल त्यांच्यावर कोणतीही कारवाई केली जाणार नाही, असेही स्पष्ट केले आहे.