आदित्य भवार, पुणे : जम्मू काश्मीर येथे झालेला पहलगाम हल्ला आणि भारतीय सैन्यदलाने केलेल्या ऑपरेशन सिंदूरच्या पार्श्वभूमीवर सुरक्षा यंत्रणा अलर्ट झाल्या असताना, हवाई दलाच्या जवानाचा युनिफॉर्म परिधान करुन लढाऊ विमानांच्या ठिकाणी फिरणाऱ्या तोतया व्यक्तीस अटक करण्यात आली आहे. दक्षिण कमांड मिलिटरी इंटेलिजन्स आणि खराडी पोलिसांच्या संयुक्त कारवाईत या आरोपीला अटक केली आहे. गौरव कुमार दिनेश कुमार (वय 25) असे या आरोपीचे नाव आहे. सध्या आरोपी वरद विनायक अपार्टमेंट, थिटे वस्ती, खराडी येथे राहत आहे. त्याचे मुळगाव अलिगड, उत्तर प्रदेशात आहे.

आरोपीकडे काय सापडले?
गौरव कुमार हा खराडी येथील एका हॉटेलमध्ये काम करतो, तो हवाई दलाचा युनिफॉर्म परिधान करून विविध ठिकाणी वावरत होता. त्याच्या घरातून हवाई दलाचे टी-शर्ट, कॉम्बॅट पँट, शूज, बॅजेस आणि ट्रॅकसूट जप्त करण्यात आले आहेत. पोलिसांनी केलेल्या तपासात असे आढळले की, त्याच्याकडे हवाई दलाच्या लढाऊ विमानांसोबत, तसेच परामेश्वरन हॉल आणि मनाई असलेल्या लष्करी परिसरांतील फोटोही सापडले आहेत.या प्रकरणी पोलीस हवालदार रामदास पालवे यांनी फिर्याद दिली आहे. माहिती मिळताच, दक्षिणी कमांडच्या गुप्तचर शाखेने कारवाई करत पोलिसांच्या मदतीने त्याच्यावर छापा टाकला. त्याने एक महिन्यापूर्वी हवाई दलाचा जुना गणवेष जाळून टाकल्याचे कबूल केले आहे.

सोशल मीडियावरही अधिकारी असल्याचे भासवले
पोलिस अधिकाऱ्याने माहिती दिली की, आम्हाला एक गुप्त माहिती मिळाली होती की, खराडी परिसरात एक व्यक्ती एअरफोर्सचा अधिकारी असल्याचे भासवून सर्वसामान्य लोकांची फसवणूक करत आहे. त्यानुसार आम्ही आमि मिलेटरी इंटेलिजन्सचा स्टाफ यांच्यासोबत प्रकरणातील आरोपी शर्मा यांच्या फ्लॅटवर छापा टाकला. आम्हाला त्याठिकाणी एअरफोर्सची वस्त्रे,शुज, बॅचेस मिळाले आहेत. मोबाईलची पाहणी केली असता, त्यामध्ये तो सोशल मीडियावर एअरफोर्सचा युनिफॉर्म घालून मी एअरफोर्सचा अधिकारी असल्याचे भासवत आहे. या अनुषंगाने ताब्यात घेतले असून चौकशी करत आहोत.

गौरव गेल्या एका वर्षापासून पुण्यात एकटाच राहत होता. त्याच्याकडून 2020 मधील बनावट ओळखपत्रही सापडले आहे. त्याने ही फसवणूक कोणत्या उद्देशाने केली, यामागे कोणती योजना होती का, याचा तपास वरिष्ठ पोलीस निरीक्षक संजय चव्हाण यांच्या मार्गदर्शनाखाली सुरू आहे.