कोण आहेत भाऊसाहेब चौधरी?

भाऊसाहेब चौधरी हे डोंबिवली रहिवासी आहेत. तसेच सध्याच्या घडीला ते शिंदेंच्या शिवसेनेचे सचिव या पदावर काम करतात. पूर्वी ते खासदार संजय राऊत यांचे कट्टर समर्थक होते. नंतर त्यांनी शिंदे गटात प्रवेश केला आणि ते उपमुख्यमंत्री एकनाथ शिंदे यांचे आणि खासदार डॉ. श्रीकांत शिंदे यांच्या मर्जितले नेते बनले. भाऊ यांचा नाशिक जिल्हा आणि डोंबिवली शहरात दांडगा संपर्क आहे. भाऊसाहेब चौधरी हे केडीएमटी सभापती होते आणि डोंबिवली शिवसेना शहरप्रमुख सुद्धा होते. त्यांना ऑक्सिजन मॅन सुद्धा म्हणतात.

कोण आहेत मिलिंद नार्वेकर?

मिलिंद नार्वेकर हे आधी एक सर्वसामान्य शिवसैनिक होते. मुंबईतील मालाडच्या लिबर्टी गार्डन परिसरात नार्वेकर शिवसनेच्या गटप्रमुख पदाचं काम पाहायचे. 1992च्या महापालिका निवडणुकांआधी त्यांच्या परिसरातील वॉर्ड विभागला गेला. नव्या वॉर्डचं शाखाप्रमुखपद मिळेल या आशेने नार्वेकरांनी मातोश्री गाठली. एका सामान्य कुटुंबात जन्माला आलेले मिलिंद नार्वेकर हे शाखाप्रमुख होण्यासाठी मुलाखत देण्याकरिता उद्धव ठाकरे यांना पहिल्यांदा भेटले. हुशार, स्मार्ट, बोलण्यात पटाईत अशी नार्वेकरांमधील चमक पाहून उद्धव ठाकरेंनी त्यांना फक्त शाखाप्रमुख बनायचंय की आणखी काही जबाबदारी उचलायची तयारी आहे? असा प्रश्न विचारला. त्यावर मिलिंद नार्वेकरांना पटकन उत्तर दिलं, “तुम्ही सांगाल ते.” तेव्हापासून नार्वेकर हे सावलीसारखे उद्धव ठाकरे यांच्यासोबत आहेत.

साधारण 1994 सालच्या उत्तरार्धात मिलिंद नार्वेकर रितसर उद्धव ठाकरे यांचे पीए बनले. संघटनेत महत्त्वाची पदे उद्धव यांच्या विश्वासू व्यक्तींकडे जातील, हे पाहण्यापासून ते राज्यात शिवसेनेच्या नेतृत्वाखालील सरकार होईपर्यंतच्या अनेक घटनांमध्ये त्यांचा आत्तापर्यंत मोठा वाटा राहिला आहे.