दादर स्थानकाच्या नावाचा इतिहास

1868 साली दादर रेल्वे स्थानक तयार झाले. दादर स्थानकाचे नाव हे बंधाऱ्यावरुन ठेवले गेले असे म्हटले जाते. माहिम बेट आणि परळ बेटाला जोडणाऱ्या बंधाऱ्याला दादर असे म्हटले जात होते. अशीही मान्यता आहे की, दादरमधून जाणाऱ्या दोन रेल्वे ट्रॅकमुळे तेथे दोन भाग निर्माण झाले होते. दोन्ही भाग जोडण्यासाठी आणि लोकांना ये जा करण्यासाठी एक ब्रीज निर्माण करण्यात आला. ब्रीजला मराठीत दादर म्हटले जाते. त्यामुळे त्यास दादर असेही म्हटले गेले.

दादरचे वैभव
मुंबईचे केंद्रबिंदू असेलेल्या दादरमध्ये मोठे भाजी मार्केट, फुल मार्केट असल्याने लोकांची गर्दी असते. शिवतीर्थ आणि शिवसेना भवनामुळे राजकीय दृष्ट्‍याही दादर महत्वाचे ठिकाण आहे. शिवसेनेचा दसरा मेळावा, मनसेचा गुडीपाडवा यावेळी लाखोंची गर्दी छत्रपती शिवाजी महाराज पार्कात होते. शिवाजी मंदिर नाट्यगृह हे मराठी रंगभूमीसाठीचे महत्त्वाचे ठिकाण दादरमध्येच आहे. येथेच मराठी चित्रपटांसाठी हक्काचे प्लाझा चित्रपटगृह ही आहे. चौपाटीजवळ चैत्यभूमी आहे. तेथे दरवर्षी लाखो अनुयायी डॉ. बाबासाहेब आंबेडकर यांना वंदन करण्यासाठी येतात. पारसी कॉलनी, हिंदू कॉलनी, चाळी आणि आता निर्माण झालेल्या टोलेजंग इमारती असे वेगवेगळे परिसर दादरमध्ये आहेत.

छत्रपती शिवाजी महाराज पार्क आर्ट फेस्टीव्हलही साजरा केला जातो. प्राचीन शस्त्रास्त्र प्रदर्शन, ऐतिहासिक किल्ल्यांच्या छायाचित्राचे प्रदर्शन, चित्रकला, हस्तकला कार्यशाळा, फूड फेस्ट, संगीतमय कार्यक्रमांची रेलचेल या कला महोत्सवात असते. 2022 पासून हा फेस्टीव्हल सुरू करण्यात आला आहे. हा फेस्टिव्हलही दादरची नवी सांस्कृतिक ओळख बनू लागला आहे.