हळदीच्या कार्यक्रमात बाळू ऊर्फ बिटया मधूकर मुकणे, प्रकाश रमेश पवार हे डीजेच्या तालावर कपडे काढून नाचत होते. यावेळी मंडपात महिला देखील उपस्थित होत्या. त्यामुळे 40 वर्षीय अनंता गोपाळ वाघमारे आणि 38 वर्षीय विलास गोपाळ वाघमारे यांनी बाळू मुकणे आणि प्रकाश पवार यांना कपडे काढून न नाचता व्यवस्थित कपडे घालून नाचण्याचं आवाहन केलं. पण यावरुन वाद झाला. हा वाद इतका टोकाला पोहोचला की, बाळू मुकणे आणि प्रकाश पवार यांनी दोघांवर लोखंडी कालथ्याने मारहाण केली. या मारहाणीत अनंता गोपाळ वाघमारे यांचा मृत्यू झाला. तर विलास गोपाळ वाघमारे हे गंभीर जखमी झाले. विलास वाघमारे यांनी या प्रकरणी खोपोली पोलीस ठाण्यात तक्रार दिली.

नेमंक काय घडलं?

पोलिसांकडून मिळालेल्या माहितीनुसार, १३ मे च्या रात्री बीड गावाच्या आदिवासी वाडीत लग्नसमारंभा निमित्त हळदीचा कार्यक्रम होता. या कार्यक्रमात बाळू मुकणे आणि प्रकाश पवार मंद्यधुंद होऊन नाचत होते. त्यांनी नाचताना शर्ट काढून ते नाचू लागले म्हणून त्या आदिवासी वाडीतील विलास वाघमारे यांनी त्यांना अडवले. येथे मुली, महिला नाचत आहेत. त्यामुळे तुम्ही कपडे काढून नाचू नका, असे सांगितले.

या गोष्टीचा मनात राग धरून बाळू मुकणे आणि प्रकाश पवार यांनी विलास वाघमारे यांना मारहाण करायला सुरुवात केली. तेव्हा विलास वाघमारे यांचा भाऊ अनंता वाघमारे हे भांडण मिटवायला मध्ये पडले. तेव्हा प्रकाश पवार याने बाजूला पडलेला भात शिजवायचा भला मोठा कालता (उलाथने) उचलला आणि विलास वाघमारे याच्या डोक्यात आणि हातावार मारला. त्यामुळे विलास यांच्या डोक्यात मोठी जखम झाली. ते रक्तबंबाळ होऊन बाजूला पडले. तर अनंता यांच्यावरही हल्ला केला.

दरम्यान, दोन्ही भावांना रिक्षाने खोपोलीत आणण्यात आले. पण यात मोठा भाऊ अनंता वाघमारे यांचा रुग्णालयात आणत असतानाच रस्त्यातच त्यांची प्राणजोत मालावली. तर विलास वाघमारे यांच्या डोक्यात सहा टाके पडले. सदर घटना खोपोली पोलिसांना समजताच त्यांनी घटनास्थळी धाव घेतली तेव्हा आरोपी तेथून पसार झाले होते. पण त्या दोघांपैकी बाबू मधुकर मुकणे यास केळवली रेल्वे स्थानकात १३मे रोजी रात्री आठ वाजून बावन्न मिनिटांनी खोपोली पोलिसांनी ताब्यात घेतलं. पण दुसरा आरोपी प्रकाश रमेश पवार हा काही सापडला नाही. त्याचा शोध खोपोली पोलीस घेत आहेत.