Mumbai Maathi News : मुंबईतील वीरमाता जिजाबाई भोसले वनस्पती उद्यानात (राणी बाग) लवकरच बोगद्यातील मत्स्यालय सुरु होणार आहे. यासाठी कंत्राटदाराची निवड झाली आहे. पर्यटकांना विविध प्रकारचे मासे पाहता येणार आहेत. तसेच, पेंग्विनची संख्या वाढल्यामुळे पेंग्विन कक्षाचा विस्तार करण्याचा निर्णय घेण्यात आला आहे. मत्स्यालय आणि पेंग्विन कक्षाचा खर्च ८१ कोटी ५८ लाख रुपये असणार आहे. ही कामे एक ते दीड वर्षात पूर्ण होतील.
सन २०१७मध्ये राणी बागेत पेंग्विन आणण्यात आले आणि या बागेत पर्यटकांची संख्या वाढत गेली. राणी बागेचा सध्याच्या जागेतच विस्तार करून विदेशी प्राणिसंग्रहालय सुविधा देण्याचे प्रस्तावित आहे. केंद्रीय प्राणिसंग्रहालय प्राधिकरणाच्या सध्याच्या नियमानुसार प्राणिसंग्रहालयात विदेशी प्राणी जोडण्यासाठी स्थानिक प्रजातीच्या प्राण्यांची संख्या वाढवणे आवश्यक आहे. त्यामुळे विद्यमान राणी बागेतील जागेची मर्यादा लक्षात घेता मत्स्यालय तयार करण्याचा निर्णय घेतला. त्यामुळे राणी बागेतील इंटरप्रिटेशन सेंटर इमारतीच्या तळमजल्यावर पेंग्विन कक्षासमोरच बोगद्यातील मत्स्यालय तयार केले जाणार आहे. यासाठी निविदा काढल्यानंतर कंत्राटदाराची नियुक्ती करण्यावर शिक्कामोर्तब करण्यात आले आहे. लवकरच कंत्राटदाराला कामाचे कार्यादेशही दिले जातील, अशी माहिती राणी बागेचे संचालक डॉ. संजय त्रिपाठी यांनी दिली.
Merto in Mumbai : बीकेसी ते वरळी नाका, गायमुख-ठाणे ते वडाळा, दहिसर ते भाईंदर, ते अंधेरी; चहुदिशांना मेट्रो, कुठून ते कुठे, कशी असणार स्थानकं?
असे असेल मत्स्यालय
- मत्स्यालयाच्या प्रवेशद्वाराजवळ घुमटाकार छत.
- मत्स्यालयामध्ये १४ मीटर लांबीचे कोरल फिश बोगदा मत्स्यालय आणि ३६ मीटर लांबीचे खोल महासागर बोगदा मत्स्यालय असेल. जे पर्यटकांसाठी आकर्षण ठरतील.
- स्टेनलेस स्टीलचा उन्नत पदपथ
- बोगदा मत्स्यालयाव्यतिरिक्त प्रस्तावित मत्स्यालयात चार आयताकृती टाक्या, पाच वर्तुळाकार टाक्या आणि दोन अर्धगोलाकार टाक्या प्रस्तावित आहेत. ज्यामध्ये विविध प्रकारचे मासे ठेवण्यात येतील.
- मत्स्यालयातून बाहेर पडताना स्मरणिका दुकानही केले जाईल. यामध्ये वन्यजीव, वनस्पतीशास्त्र, प्राणीशास्त्र, इत्यादीशी संबंधित पुस्तके, खेळणी, कापड असतील, ज्यामधून महापालिकेला महसूल मिळेल.
मुंबई महापालिकेची मोठी कारवाई; ‘त्या’ कंत्राटदाराला ३ वर्षांसाठी टाकले काळ्या यादीत, काय कारण?
पेंग्विन कक्षाचा विस्तार
राणी बागेत पर्यटकांचे खास आकर्षण हे पेंग्विन ठरत आहेत. २०१७मध्ये राणी बागेत पेंग्विन दाखल झाले. त्यावेळी पेंग्विनची संख्या आठ होती. २०२४च्या अखेरपर्यंत १८ पेंग्विन होते. आता हीच संख्या २१पर्यंत पोहोचली आहे. पेंग्विनची संख्या आणखी वाढल्यास आयत्यावेळी गोंधळ उडण्यापेक्षा मुंबई महापालिकेने आतापासून पेंग्विन कक्षाच्या विस्ताराची तयारी सुरू केली आहे. सध्याच्या पेंग्विन कक्षाच्या मागील बाजूस असलेल्या अतिरिक्त जागेवर त्याचा विस्तार केला जाणार आहे.
लेखकाबद्दलहरिश मालुसरे महाराष्ट्र टाइम्स ऑनलाईन टीममध्ये सिनिअर डिजिटल कंटेंट प्रोड्युसर म्हणून कार्यरत. क्रीडा, राजकीय आणि क्राईम बातम्यांमध्ये विशेष आवड. झी 24 तास आणि टीव्ही9 मराठीसह पत्रकारिता क्षेत्रात 04 वर्षांचा अनुभव.… आणखी वाचा