यापूर्वी आघाडी असताना कार्यकर्त्यांनी परिश्रम घेतले. यानंतर महायुतीत लोकसभा व विधानसभा निवडणुकीत संपूर्ण पक्ष भाजपच्या खासदार, आमदारांच्या विजयासाठी कामाला लागला. ही कार्यकर्त्यांची निवडणूक असल्याने त्यांच्याही अपेक्षा आहे. दुसरीकडे आम्हालाही पक्षाचा विस्तार करायचा आहे. राज्यात महायुती असल्याने सन्मानजनक जागा मिळवण्यासाठी प्रयत्न केले जातील. योग्य प्रमाणात जागा न मिळाल्यास पक्ष पूर्ण ताकदीने निवडून लढेल, असेही पवार यांनी जाहीर केले.

राज्यात महायुतीत सहभागी झाल्यापासून पक्षाचे बळ वाढवण्याचे प्रयत्न चालले आहेत. लोकसभा व विधानसभा निवडणुकीत पक्षाचा जनाधार वाढला. उपमुख्यमंत्री व पक्षाध्यक्ष अजित पवार यांनी नेहमीच विकासाला साथ दिली. त्यामुळे पुढच्या आठवड्यात ‘विकासाचा वादा, अजित दादा’ही यात्रा सर्व प्रभागात काढण्यात येईल. निवडणुकीसाठी सर्वत्र पक्षाचे पॅनल सज्ज आहे. मात्र, आपल्याकडून कुठलीही घाई केली जाणार नाही. वाटाघाटीनंतर सर्व विचार केला जाईल, असेही प्रशांत पवार म्हणाले.

सर्वाेच्च न्यायालयाने दोन दिवसांपुर्वीच महाराष्ट्रातील स्थानिक स्वराज्य संस्थांच्या निवडणुका पुढील 4 महिन्यात घेण्याचा निर्णय दिला होता. त्यानंतर राज्यातील पक्षांनी स्थानिक स्वराज्य संस्थेच्या निवडणुकीच्या तयारीची चाचपणी करु लागले आहेत. राज्यात महायुतीचे सरकार आहे मात्र स्थानिक स्वराज्य संस्थेच्या निवडणुकीत अनेक ठिकाणी युतीत बिघाडी होण्याची चिन्हे दिसत आहेत. महाविकास आघाडी स्थानिक स्वराज्य संस्थांच्या निवडणुकांमध्ये विशेषत: महापालिका एकत्र लढणवार की एकला चलो रेचे धोरण स्वीकारणार हे नेत्यांवरही अवलंबून असले तरी महायुती काय निर्णय घेते यावर अवलंबून आहे.