Palghar Mock Drill Self Defense : पालघर जिल्ह्यातील तारापूर येथे अणुऊर्जा प्रकल्प असल्याने राष्ट्रीय सुरक्षेच्या दृष्टिकोनातून हे ठिकाण अतिसंवेदनशील आहे. युद्धजन्य परिस्थिती निर्माण झाल्यास तारापूर अणुऊर्जा प्रकल्प सारख्या अति संवेदनशील ठिकाणी हल्ला होण्याची शक्यता नाकारता येत नाही. त्यामुळे बुधवारी केंद्रीय गृह विभागाच्या मार्गदर्शक सुचनांनूसार विजयनगर कॉलनी मैदानात ‘ऑपरेशन अभ्यास’ मॉक ड्रिल पार पडले.
मॉकड्रिल दरम्यान हवाई हल्ल्याची शासनाकडून सूचना मिळाल्यानंतर बोईसर शहरातील टॅप्स कॉलनी गेट परिसरात असलेले सायरन वाजवून नागरी संरक्षण दलामार्फत नागरिकांना धोक्याचा इशारा देण्यात आला. हवाई हल्ला होऊन बॉम्ब फुटणे, आग लागणे यांसारख्या घटना घडल्यानंतर कशाप्रकारे बचाव पथकामार्फत उपाययोजना करण्यात येतात व मदतकार्य राबविण्यात येते. याची प्रात्यक्षिके दाखवण्यात आली.
त्याचप्रमाणे आपत्कालीन शोध व बचाव साहित्याचा वापर, वैद्यकीय पथकाची मदत, आपात्कालीन परिस्थितीत नागरिकांनी या प्रकारे आपल्या संरक्षण करावे, सुरक्षित स्थळी आश्रय घ्यावा, नागरिकांनी कोणती काळजी घ्यावी कशाप्रकारे इतरांचे व स्वतःचे रक्षण करावे. जखमी झालेल्यांना कशाप्रकारे मदत करावी, युद्धजन्य परिस्थितीला नागरिकांनी कशाप्रकारे सामोरे जावे याबाबतचे प्रात्यक्षिक दाखवण्यात आले आहेत. प्रात्यक्षिकांच्या माध्यामातून मार्गदर्शन करून मॉक ड्रिल करण्यात आले. या मॉक ड्रिलमध्ये नागरी संरक्षण दलाचे वॉर्डन व स्वयंसेवक, अग्निशमन दल, होमगार्ड, राष्ट्रीय छात्र सेना व राष्ट्रीय सेवा योजना तसेच महाविद्यालयीन विद्यार्थी सहभागी झाले. याखेरीज महसूल, पोलीस, आरोग्य विभाग, आपत्ती व्यवस्थापन विभाग आणि इतर शासकीय विभाग सहभागी झाले होते.
लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड.… आणखी वाचा