अपघातात मृत्यू झालेले तिघे टेम्पो चालक रोशन कडूजी टेकाम, रमेश देहनकर आणि रामकृष्ण मसराम हे कृषी उपज पोहचवून परत काटोलकडे जात होते. दरम्यान, नागपूरहून कळमेश्वरकडे जाताना त्यांनी एका वाहनाला ओव्हरटेक करण्याचा प्रयत्न केला. ओव्हरटेक करताना त्यांचा टेम्पो समोरून येणाऱ्या ट्रकला समोरुन जोरदार धडकला. याचवेळी त्यांच्या टेम्पोने एका मोपेडलाही धडक दिली. या घटनेत मोपेड चालक माणिक महादेवराव बंधराम हे गंभीर जखमी झाले आहेत.
Jalgaon News: क्लासला जायला निघाल्या, वाटेत अनर्थ घडला अन् मैत्रिणींची साथ कायमची सुटली, १३ वर्षांच्या विद्यार्थिनीचा मृत्यू
हा अपघात इतका भीषण होता की टेम्पोचा पूर्ण चक्काचूर झाला आहे. अपघातानंतर घटनास्थळी मोठी गर्दी झाली होती. अपघातातील जखमींना तातडीने रुग्णालयात हलवण्यात आले. मात्र, उपचारादरम्यान रोशन टेकाम, रमेश देहनकर आणि मसराम या तिघांचा मृत्यू झाला. तर, मोपेडचालकावर खासगी रुग्णालयात उपचार सुरू असून त्यांची प्रकृती चिंताजनक असल्याचे सांगण्यात येत आहे.

या घटनेची माहिती मिळताच पोलीस तात्काळ घटनास्थळी दाखल झाले. त्यांनी मृतदेह पोस्टमार्टमसाठी पाठवले असून ट्रक चालक शेख रफिक याला अटक करण्यात आली आहे. याप्रकरणी पुढील तपास सुरू असल्याचे पोलिसांनी सांगितले.

प्राथमिक तपासानुसार, ओव्हरटेक करताना टेम्पो चालकाचे वाहनावरील नियंत्रण सुटल्याने हा अपघात घडल्याचे समजते. या अपघातात काही दुचाकी चालक देखील किरकोळ जखमी झाले आहेत. नागपूर जिल्ह्यातील काटोल रोडवर वारंवार होणाऱ्या अपघातांमुळे वाहनचालकांमध्ये भीतीचे वातावरण निर्माण झाले आहे. या दुर्घटनेने तीन कुटुंबांवर दु:खाचा डोंगर कोसळला असून परिसरात हळहळ व्यक्त केली जात आहे. प्रशासनाने अपघात प्रवण ठिकाणी योग्य ती खबरदारी घेण्याची मागणी नागरिकांकडून केली जात आहे.