अहिल्यानगर, दि. ०३: माजी आमदार दिवंगत अरुण जगताप यांच्या कुटुंबियांचे उपमुख्यमंत्री अजित पवार यांनी सांत्वन केले. जगताप यांच्या निवासस्थानी भेट देऊन आमदार संग्राम जगताप, सचिन जगताप व कुटूंबातील अन्य सदस्यांचे सांत्वन केले.
यावेळी आमदार शिवाजी कर्डिले, आमदार काशिनाथ दाते, जिल्हाधिकारी डॉ. पंकज आशिया, जिल्हा परिषदेचे मुख्य कार्यकारी अधिकारी आशिष येरेकर आदी उपस्थित होते.
उपमुख्यमंत्री पवार म्हणाले, अरुणकाका जगताप यांच्या निधनाने सर्वत्र शोककळा पसरली असून सामान्यांची घट्ट नाळ जुळलेले कर्तृत्ववान नेतृत्व हरपले आहे. त्यांच्याशी अत्यंत निकटचे संबंध होते. सर्वांना सोबत घेऊन अत्यंत चोखपणे काम करण्याचा त्यांचा कटाक्ष होता. जगताप कुटुंबियांना हे दु:ख सहन करण्याचे बळ मिळो, अशी प्रार्थना करत त्यांचे अपूर्ण काम पूर्णत्वास नेणे हीच खरी त्यांना श्रद्धांजली ठरेल, अशा शब्दात त्यांनी आपल्या भावना व्यक्त करत त्यांना श्रद्धांजली वाहिली.