^{धडगांव तालुक्यातील बिलगांव-हेंद्र्यापाडा गांवातील महिलांना हंडाभर पाण्यासाठी वणवण भटकावे लागत आहे. डोंगरद-यातून पिण्यासाठी हंडाभर पाणी आणावे लागत आहे.डोंगरद-याची एवढी बिकट वाट आहे की, हंडाभर पाणी आणताना वाटेतच पाण्याचा हंडा अर्धा होतो; घरात अर्धा हंडाच पाणी पोहचते.}

हेंद्र्यापाडा सारख्या आदिवासी दुर्गम भागात जलजीवन मिशन योजना नुसती कागदोपत्रीच पोहचली आहे,पाणी मात्र पोहचलेच नाही.या पाड्यांची एकूण १३० पेक्षा अधिक लोकसंख्या आहे. हेंद्र्यापाडा हा बिलगाव ग्रामपंचायतीतील आहे. या पाड्यात जाण्यासाठी रस्ता नाही. येथे वीजही पोहोचलेली नाही. या वाड्यातील महिला तसेच नागरिकांना पाण्यासाठी डोंगरदऱ्यात उतरून खडतर प्रवास करत पाण्याची व्यवस्था करावी लागत होती. याबाबतची बातमी महाराष्ट्र टाइम्स ऑनलाइन ने 8 एप्रिल रोजी प्रकाशित केली होती. बातमी वाचून सातपुड्यातील दुर्गम भागात असलेल्या हेंद्र्यापाडा येथील नागरिकांचा मदतीला पुणे येथील “सहयोग – Together We Can Do It” ही संस्था धावून आली.

वृंदा पंचवाघ यांच्यासह त्यांच्या टीमने हेंद्र्यापाडा येथे जाऊन पाहणी केली. मात्र त्या ठिकाणी रस्ता नसल्याने जिथपर्यंत टँकर जाईल तिथपर्यंत जाण्याची व्यवस्था केली. त्यामुळे गावकऱ्यांना टँकरद्वारे पाणी मिळणार आहे. काही प्रमाणात गावकऱ्यांच्या पाणी समस्याचे निवारण होणार आहे. हेंद्र्यापाडा येथील नागरिकांच्या मदतीला 600 किलोमीटरवरून एक सेवाभावी संस्था मदतीला आली मात्र नंदुरबार जिल्ह्यातील प्रशासन याकडे दुर्लक्ष करत असल्याचे चित्र दिसून येत आहे याबाबत नागरिकांनी नाराजी व्यक्त केली.