Mansi Sakore Shirur UPSC Success Story : शिरूरच्या डॉ. मानसी साकोरे यांनी यूपीएससी परीक्षेत सलग तिसऱ्यांदा यश मिळवून इतिहास रचला आहे. 2025 च्या परीक्षेत 454 वा क्रमांक मिळवत त्या शिरूरच्या पहिल्या महिला आयपीएस अधिकारी बनल्या आहेत. जिद्द आणि चिकाटीच्या जोरावर त्यांनी हे यश संपादन केले असून, त्यांचा हा प्रवास अनेक तरुणांसाठी प्रेरणादायी आहे.
डॉ. मानसी यांचे प्राथमिक शिक्षण नगरपालिकेच्या शाळेत, तर पाचवी ते बारावीचे शिक्षण विद्याधाम प्रशालेत झाले. वैद्यकीय शिक्षणासाठी त्यांनी मुंबई गाठली आणि डॉक्टरकी पूर्ण केली. याच काळात त्यांनी यूपीएससी परीक्षेची तयारीही सुरू ठेवली. सुरुवातीच्या दोन प्रयत्नांत अपयश आले, पण खचून न जाता त्यांनी जिद्द आणि चिकाटीने अभ्यास सुरू ठेवला. त्यांच्या या मेहनतीला 2023 मध्ये 563 वी, 2024 मध्ये 531 वी आणि 2025 मध्ये 454 वी रँक मिळवत यश प्राप्त झाले.
डॉ. मानसी यांचे कुटुंबही सेवा क्षेत्राशी जोडलेले आहे. त्यांची मोठी बहीण डॉ. दीपिका नागपूर येथे सहाय्यक आरोग्य संचालक असून, लहान भाऊ डॉ. जय साकोरे पुण्यातील संचेती हॉस्पिटलमध्ये अर्थोपेडिक सर्जन म्हणून कार्यरत आहेत. आयआरटीएस अधिकारी कृष्णात पाटील यांचे मार्गदर्शनही त्यांना लाभले. आपल्या यशाबद्दल बोलताना डॉ. मानसी म्हणाल्या, “आई-वडील आणि कुटुंबाच्या पाठबळामुळे हे यश मिळाले. अपयश हे अंतिम नसते. तरुणांनी जिद्द, चिकाटी आणि पर्यायी योजना तयार ठेवावी. सातत्याने मेहनत केल्यास यश निश्चित मिळते.” त्यांचा हा प्रवास ग्रामीण भागातील विद्यार्थ्यांसाठी आदर्श ठरत आहे.
शिरूर तालुक्यातील या यशस्वी प्रवासाने डॉ. मानसी यांनी केवळ कुटुंबाचाच नव्हे, तर संपूर्ण तालुक्याचा गौरव वाढवला आहे. शिरूर शहरात त्यांच्या यशाचा आनंद साजरा केला जात आहे. त्यांचे हे यश शालेय विद्यार्थ्यांपासून स्पर्धा परीक्षेच्या तयारी करणाऱ्या प्रत्येकासाठी प्रेरणादायी आहे.