शिवसेनेत प्रवेश केलेल्या कार्यकर्त्यांचा मेळावा आणि शिवसेना सदस्य नोंदणी अभियान याची माहिती देण्यासाठी पुण्यात शिवसेनेतर्फे मेळावा घेण्यात आला. या मेळाव्याला शिवसेना नेत्या निलम गोऱ्हे या उपस्थितीत होत्या. यावेळी बोलताना नीलम गोऱ्हे यांनी संबंधित वक्तव्य केल्याचा दावा केला जातोय. “नंतरच्या काळात युती होईल की नाही माहिती नाही. मुंबई आणि ठाणे वगळता इतर ठिकाणी युती होईल की नाही माहिती नाही. महापालिकेत मुंबई आणि ठाणे सोडून युती होणं थोडसं अवघड आहे, युती झाली तर आनंदच आहे, मात्र त्यावर अवलंबून राहून बसू नका”, असं आवाहन नीलम गोऱ्हे यांनी केल्याचं कथित ऑडिओ क्लिपमध्ये म्हटलं आहे.

व्हायरल ऑडिओ क्लिपमध्ये नेमकं काय?

“युती होणं थोडसं अवघड आहे. युती झाली तर आपल्याला आनंद आहे. प्रश्नच नाही. पण त्यावर अवलंबून राहून तुम्ही बसलात तर, जिथे त्यांचे आमदार आहे तिथे त्यांना असं वाटणं स्वभाविक आहे, शिंदे, फडणवीस आणि अजित पवार यांचे मिळून ठरलं, जसं डीपीडीमध्ये ठरलेलं आहे की 30-30 टक्के एकाककडे आणि 20 टक्के एकाकडे, किंवा अजून काही मित्र पक्ष, तसं काही ठरलं तर आनंदच आहे. पण मग कुठेतरी बंडखोरी विचार आधीच करुन ठेवायचा हा प्रकार सुरु होतं”, असं नीलम गोऱ्हे या ऑडिओ क्लिपमध्ये बोलत असल्याचं स्पष्ट होत आहे.

“दुसरं एक लक्षात घ्या, 50 टक्के महिलांसाठी आहे. तर उर्वरित 50 टक्क्यांमध्ये चार कॅटेगरी आहेत. सर्वसाधारण, एससी, एसटी आणि ओबीसी आहेत. म्हणजेच प्रत्येक महापालिका क्षेत्रात आपल्याला आठ माणसं लागणार आहेत ज्यांच्यापैकी एक संभाव्य उमेदवार होऊ शकतो. त्या संभाव्य उमेदवाराला तु्म्ही आताच निराश करुन टाकलं तर उद्या…”, असं नीलम गोऱ्हे या कथित ऑडिओ क्लिपमध्ये म्हणाल्याचा दावा केला जातोय.