मुस्तफा आतार, पुणे: पुणे शहराभोवतीचा प्रस्तावित वर्तुळाकार मार्ग (रिंगरोड) आणि नियोजित आंतरराष्ट्रीय विमानतळ यामुळे पुरंदर तालुक्यामधील जमिनींना चांगलीच मागणी वाढली आहे. विमानतळ पुरंदरमध्ये होणार, हे स्पष्ट झाल्यानंतर पुन्हा एकदा जागा खरेदी-विक्रीच्या व्यवहारांत वाढ झाली असून, गेल्या तीन महिन्यांत खरेदीखतांची संख्या गेल्या वर्षीच्या तुलनेत दुपटीने वाढली आहे.

■ खरेदी-विक्रीला वेग
पुरंदर तालुक्यात गेल्या काही वर्षांपासून आंतरराष्ट्रीय विमानतळ होणार असल्याची चर्चा सुरू आहे. सरकारने १० मार्चला नव्याने अधिसूचना जारी केली असली, तरी गेल्या काही वर्षांत विमानतळासाठी निवडलेल्या वनपुरी, कुंभारवळण, एखतपूर, उदाचीवाडी, मुंजवडी, खानवडी, पारगाव या गावांमध्ये सातत्याने जमिनीच्या व्यवहारांची संख्या वाढत आहे. सरकार याच ठिकाणी विमानतळाबाबत ठाम असल्याचे स्पष्ट झाल्यानंतर गेल्या तीन महिन्यांत या सातही गावांमध्ये खरेदीखतांमध्ये लक्षणीय वाढ झाल्याचे दिसते. त्याशिवाय, पुरंदर तालुक्यातील दिवे, चांबळी, सोनोरी गराडे यासह अन्य काही गावांमधून रिंगरोड जात आहे. त्यासाठी बहुतांश भूसंपादन पूर्ण झाले आहे. रिंगरोडसाठी संपादित झालेल्या जमिनींना समृद्धी महामार्गाच्या धर्तीवर पाचपट दर मिळाला. त्यामुळे रिंगरोडसाठी जमिनी देण्यास सुरुवातीला विरोध करणाऱ्या शेतकऱ्यांसह जमीनमालकांची चांदी झाली आहे.
Hemlata Patil: हेमलता पाटलांचा शिंदेंच्या शिवसेनेला ‘जय महाराष्ट्र’; दीड महिन्यांतच मोठा निर्णय का?
■ विमानतळामुळे प्लॉटिंग
विमानतळाची अधिसूचना जारी झाल्याने आता विमानतळाच्या प्रस्तावित सात गावांच्या नजीकच्या गावांमध्ये जमिनींचा शोध सुरू झाला आहे. त्या ठिकाणी जमिनीच्या किमती गगनाला भिडू लागल्या आहेत. मोठ्या व्यावसायिकांकडून थेट ‘प्लॉटिंग’ सुरू झाले आहे. बोपदेव घाट उतरला, की सासवडकडे जाताना डाव्या, उजव्या बाजूला लावलेले होर्डिंग येणाऱ्या-जाणाऱ्यांचे लक्ष वेधून घेत आहेत. त्यावर चक्क ऑफर स्वरूपात एक गुंठ्यापासून ते ११ गुंठ्याचे प्लॉटिंग केल्याच्या जाहिराती झळकत आहेत. ‘दोन लाख ९९ हजारांपासून ते आठ लाख ९९ हजारापर्यंत विमानतळापासून अमुक अंतरावर’ अशी जाहिरातबाजी करून विक्री सुरू आहे. शेतकऱ्यांच्या जमिनी कवडीमोल दराने घेऊन १०० एकर आणि त्यापेक्षा अधिक क्षेत्राचे प्लॉटिंग केल्याचे चित्र आहे. त्याची विक्रीही जोमात सुरू आहे.
Sanjay Raut: ‘तो’ आका मंत्रिमंडळात! सिंधुदुर्ग हत्याकांडप्रकरणी खासदार संजय राऊत यांचा आरोप
■ सर्वांचे हात तुपात
विमानतळामध्ये जमिनी जाणार असल्याच्या शक्यतेनेच या सात गावांमधील शेतकऱ्यांनी विरोध दर्शविला असला, तरी प्रत्यक्षात दुसरीकडे जमिनी घेऊन सोय केली आहे. त्यातून शेतकऱ्यांसह गुंतवणूकदारांचे ‘पाँचो उंगलिया घी में’ अशी स्थिती आहे. एकीकडे शेतकरी विरोध दर्शवित असले, तरी त्यातील दुसरा गट मात्र, ‘चोरी छुपे’ अधिकारी, एजंटांकडून किती पट दर मिळणार आहे याची चाचपणी करू लागला आहे. ‘चांगला दर आला तर जमीन द्यायची; पण विरोध करून आणखीच काही पदरात पडते आहे का,’ याचाही ‘छुपा अजेंडा’ राबविला जात असल्याचे निरीक्षण जाणकारांनी नोंदविले. विमानतळामुळे जमिनींना भाव येणार असल्याने दलाल सक्रिय झाले आहेत. त्यामुळे जमीन खरेदी-विक्रीच्या व्यवहारांत वाढ झाली आहे. जमिनी अधिक किमतीने सरकारला देण्याचे प्रयत्न सुरू असल्याची चर्चा आहे. शेतकऱ्यांनी दलालांना जमिनी विकू नयेत, असे आवाहन जिल्हाधिकाऱ्यांनी केले होते.

विमानतळानजिकच्या गावांना भाव
प्रस्तावित पुरंदर विमानतळ आणि रिंगरोडच्या नजीकच्या काही गावांमध्ये सध्या जमिनींना मागणी वाढली आहे. त्यात प्रामुख्याने पारगाव, वनपुरीजवळील रिसे, पिसे, पिसर्वे, टेकवडे, नायगाव या गावांमध्ये जमिनीच्या गुंतवणुकीसाठी अनेकांना रस दाखविण्यास सुरुवात केली आहे. तर रिंगरोड नजिकच्या बोपगाव, भिवरी, हिवरे, गराडे या भागांमध्ये जमिनीचे व्यवहार सुरू आहेत, असे निरीक्षण या भागातील काही जाणकारांनी नोंदविले.
मध्य रेल्वेप्रवाशांसाठी Good News! आता ‘या’ एक्स्प्रेसमध्ये मिळणार ATM सेवा, देशातील पहिलाच प्रयोग
पुरंदर तालुक्यात रिंगरोडमुळे चांबळी, दिवे, सोनोरी, गराडे या गावांतील जमिनींना भाव आहेच; पण त्या शेजारील भिवरी, बोपगाव, कोडीत खुर्द, कोडीत बुद्रुक या गावांमधील जमिनींना मागणी वाढली आहे. त्यामुळे सध्या जमिनीचे भाव गगनला भिडू लागले आहेत. पुण्यासह मुंबईतील गुंतवणूकदारांची मागणी वाढली आहे. –अप्पा सावंत, रिअल इस्टेट एजंट

पारगावमधील जमिनींचे व्यवहार
२०२३ —५९
२०२४ —१४९
२०२५ —७६
(२०२५मधील दस्त जानेवारी ते मार्च दरम्यान) (पुरंदर तालुक्यातील पारगाव येथे जमीन खरेदी-विक्रीचे सर्वाधिक व्यवहार झाले आहेत. येथील दस्तांच्या गेल्या तीन वर्षांतील आकडेवारीवरून या व्यवहारांची कल्पना येते.)