उद्या यात्रेचा मुख्य दिवस
लाखो भक्तांच श्रद्धास्थान असलेल्या वाडी रत्नागिरी येथील दख्खलचा राजा ज्योतिबाच्या यात्रेला सुरुवात झाली आहे. माघ महिन्यात ज्योतिबाचे पाच थेटे मारून झाल्यानंतर चैत्र महिन्यात ज्योतिबाची यात्रा भरत असते. चैत्र पौर्णिमा हस्त नक्षत्रावर जोतिबा यात्रेचा मुख्य दिवस असतो. यासाठी पहाटे पाच ते सहा वाजता जोतिबाचा शासकीय महाअभिषेक होतो. साधारण सकाळी नाथांची महावस्त्र व अलंकारिक पूजा केली जाते. दुपारी एक ते दीड च्या दरम्यान मुख्य यात्रेचा प्रारंभ होतो. यावेळी कोल्हापूर जिल्ह्याचे पालकमंत्री, पश्चिम महाराष्ट्र देवस्थान समितीचे सर्व पदाधिकारी, जोतिबा मंदिरातील सर्व पुजारी व मानाच्या सासनकाठ्या चे प्रमुख यावेळी उपस्थित असतात. परंपरेनुसार उद्या शनिवारी पहाटे पाच वाजता शासकीय अभिषेक होणार आहे. दुपारी बारा वाजता पालकमंत्री प्रकाश आबिटकर यांच्या हस्ते सासनकाठी मिरवणुकीला प्रारंभ होणार आहे.

चार मजली दर्शन रांग
दरवर्षी यात्रेसाठी लाखो भाविक ज्योतिबा डोंगरावर दाखल होत असतात यामुळे पोलिसांकडून आणि पश्चिम महाराष्ट्र देवस्थान समितीच्या वतीने चोख बंदोबस्त करण्यात येत असत. यंदा भाविकांना सुटसुटीतपणे दर्शन घेता यावे यासाठी दर्शन मंडपातील चार मजली दर्शन रांगेसाठी वापरण्यात येत असून ठिकठिकाणी पंखे बसविण्यात आले असून ठिकठिकाणी आपत्कालीन नियंत्रण कक्ष स्थापन केले आहेत तसेच अग्निशमन विभाग कर्मचारी देखील तैनात करण्यात आले आहेत. तर घरबसल्या भाविकांना दर्शन व्हावं यासाठी लाईव्ह दर्शनाचे व्यवस्था देखील करण्यात आली आहे.

24 तास पोलीस तैनात
यात्रेदरम्यान कोणताही अनुचित प्रकार घडू नये यासाठी डोंगरावर चोख पोलीस बंदोबस्त ठेवण्यात आला असून ठिकठिकाणी पोलिसांचे वॉच टॉवर उभारण्यात आले आहे. तसेच पोलिस अधीक्षक 1, अपर अधीक्षक 2, उपअधीक्षक 6. निरीक्षक 25 , उपनिरीक्षक 70, महिला पोलिस, वाहतूक पोलिस, शीघ- कृती दल, आरसीपी, होमगार्ड, एसआरपी असे दोन हजारांवर पोलिस तैनात आहेत. जोतिबा डोंगर परिसरात 34 हून अधिक ठिकाणी पार्किंगची व्यवस्था करण्यात आले असून सासनकाठीधारकांना स्वतंत्र वाहनतळ आणि स्वतंत्र मार्ग तयार करण्यात आलय. या संपूर्ण मार्गावर वाहतूक पोलिसही तैनात करण्यात आले आहे.

गायमुखावरील सहज सेवा ट्रस्टच अन्नछत्र सुरू
यात्रेकरीता येणार्‍या भाविकांसाठी दरवर्षी विविध सामाजिक संघटना कडून अन्नछत्र सुरू करण्यात येत यंदा देखील सहज सेवा ट्रस्टच्या अन्नछत्राला प्रारंभ झाला. अन्नछत्रासाठी 400 हून अधिक स्वंयसेवक रात्रंदिवस सेवा देत असून मोठ्या प्रमाणात भाविक सेवेचा लाभ घेत आहेत.