तनिषा भिसे जुळ्या बाळांना जन्म देणार होत्या. अतिरक्तस्राव होत असल्यानं त्या मंगेशकर रुग्णालयात गेल्या. तेव्हा त्यांच्याकडून १० लाख रुपयांची मागणी डिपॉझिट म्हणून करण्यात आली. त्याचा धसका त्यांनी घेतला. त्यांचा रक्तदाब वाढला. त्यामुळे काही तासांनी त्यांचा मृत्यू झाला, अशी माहिती त्यांच्या कुटुंबियांनी दिली. या १० लाखांच्या डिपॉझिटबद्दल आज माध्यमांनी डॉ. केळकरांना प्रश्न विचारले. त्यावर अशा प्रकारे डिपॉझिट लिहून देण्याची पद्धत आमच्याकडे नाही, असं केळकर म्हणाले.
Tanisha Bhise Case : ‘धमक्यांचे फोन, भीती वाटते, रात्री झोपू शकत नाही’, डॉ. घैसास राजीनाम्यात काय-काय म्हणाले?
‘आमच्याकडे डिपॉझिट मागण्याची पद्धत नाहीए. आमच्याकडे ऍडमिशनचा पेपर आहे. या पेपरवर खर्चाचं अंदाजपत्रक आहे. हा छापील पेपर प्रत्येक रुग्णाला दिला जातो. डॉक्टर या पेपरवर रुग्णाचं नाव, कोण डॉक्टर ऑपरेट करणार आहेत, शस्त्रक्रिया करणार आहेत की नाहीत, अंदाजे खर्च किती होईल, त्याची नोंद करतात. डिपॉझिट लिहिण्याची पद्धतच आमच्याकडे नाही. पण काही कारणानं त्या दिवशी राहू, केतू काय डोक्यात आला. डॉक्टरांनी त्या कागदावर एक चौकोन करुन १० लाख रुपये डिपॉझिट लिहिलंय आणि ही गोष्ट खरी आहे. असं कोणीही लिहित नाही. इथे उपस्थित असलेल्यांना तुम्ही विचारु शकता. मी इथे दररोज साधारण १० शस्त्रक्रिया करतो. आतापर्यंत अगणित केल्या असतील, एकाही रुग्णाला असं लिहून दिलेलं नाही,’ असं डॉ. केळकरांनी सांगितलं.

‘डिपॉझिट जर कोणाला घ्यायचं असेल, तर बिलिंग डिपार्टमेंट डॉक्टरांशी बोलून, समजून घेऊन त्या रकमेपैकी किती रक्कम घ्यायची असं काही निवडक केसमध्ये ठरवलं जातं. या केसमध्ये त्यांनी तसं डिपॉझिट डॉक्टरांशी बोलून सांगितलं आहे,’ अशी माहिती केळकरांनी दिली. ‘या केसमध्ये जर रुग्ण प्रशासनापैकी कोणाकडे आला असता, तर आज या प्रकरणाला हे वळण लागलं नसतं. त्यांचं डिपार्टमेंट, त्यांची ओपीडी आणि मग तिथून रागावून घरी जाणं इतकंच त्या दिवशी घडलं,’ असं केळकर म्हणाले.
Tanisha Bhise Death: ज्यांच्यामुळे तनिषाची ‘हत्या’, त्यांच्यावर २४ तासात कारवाई व्हावी; सुप्रिया सुळे कडाडल्या
रुग्णालयातील कर्मचाऱ्यांच्या असंवेदनशीलतेवरही केळकर स्पष्टपणे बोलले. ‘असंवेदनशीलता म्हणजे ज्या रुग्णालयात खूप काम चाललंय, तिथला कर्मचारीवर्ग रुग्णांच्या बाबतीत कमी कमी संवेदनशील होत जातो. प्रत्येक व्यक्तीला जितका न्याय द्यायला हवा, तो कामाच्या गर्दीमुळे मिळत नाही. त्यामुळे त्यासाठी एक धक्का देणारी क्रिया म्हणून आम्ही याकडे बघतो. आपल्या कर्मचाऱ्यांनी आणि तिथल्या लोकांनी रुग्णांशी सहानुभूतीनं, त्याला मदत करण्याच्या दृष्टीनं वागलं पाहिजे, असं माझं प्रामाणिक मत आहे,’ असं केळकरांनी म्हटलं.