कोकणामध्ये वेगवेगळ्या सणांना अनोख्या परंपरा पाहायला मिळतात. चिपळूण तालुक्यातील गोवळकोट किनारी वसलेल्या भोई समाजाच्या वतीने गुढीपाडव्यानिमित्त वाशिष्टी नदीला दारूची धार सोडण्याची पद्धत आहे. या भोई समाजाचा उदरनिर्वाह वाशिष्टी नदीवर अवलंबून असल्याने तिच्या ऋणातून उतराई होण्यासाठी नारळी पौर्णिमेला नारळ अर्पण केला जातो आणि गुढीपाडव्यानिमित्त दारूची धार सोडली जाते. अनेक वर्षांपासून ही परंपरा सुरू आहे. यावेळी बच्चे मंडळींसह अनेक नागरिक वाशिष्ठीची सफर करायला बोटीतून जातात आणि एका विशिष्ट ठिकाणी जाऊन ही धार सोडण्याची परंपरा पूर्ण केली जाते. आलेल्या सर्वांना चहापान होतो आणि पुन्हा ती मंडळी भोईवाडी किनारी येतात. गुढीपाडव्यानिमित्त सुरू असलेल्या या परंपरेला रंगमाली असे म्हणतात. दारू ही अवैध मानली जात असली तरी श्रद्धेपोटी ही शेकडो वर्षांची ही परंपरा जपण्यात आली आहे.