पुणे: उपमुख्यमंत्री अजित पवार त्यांच्या होमग्राऊंडवर असताना भन्नाट किस्सा घडला. लाच मागणाऱ्या तलाठ्याबद्दल अजित पवार बोलत असताना एक पत्रकार उठला. त्यावर तू कशाला उठलास, ब्रेकिंग न्यूज करायचीय का, अशी विचारणा केली. तू बस खाली, मी माझ्या घरात बोलतोय, असं म्हणत उपमुख्यमंत्र्यांनी त्या पत्रकाराला खाली बसवलं. प्रत्यक्षात तो पत्रकार ब्रेकिंग न्यूजसाठी नव्हे, तर त्याचा मोबाईल बंद पडल्यानं उठला होता. हा भन्नाट किस्सा सभास्थळी चर्चेत राहिला.

एका खाजगी हॉस्पिटलच्या कार्यक्रमाला अजित पवार उपस्थित होते. त्यावेळी त्यांनी विविध विषयांवर भाष्य केलं. बारामतीचा विकास, तिथे राबवल्या जाणाऱ्या योजनांवर अजित पवार भरभरुन बोलत होते. त्यावेळी त्यांनी एका भ्रष्ट तलाठ्याचा किस्सा सांगितला. माझी सगळ्या बारामतीकरांना एक विनंती आहे. तुम्हाला कुठे काही त्रुटी जाणवली तर सांगत जा, असं आवाहन अजित पवारांनी केलं.
CM फडणवीसांच्या काकूच सरकारवर नाराज; रस्त्यावर उतरण्याचा इशारा; शोभा फडणवीस का संतापल्या?
‘मी सकाळी माळेगावला गेलो होतो. तिथे एक जवळचा कार्यकर्ता मला भेटला. म्हणाला, दादा माझं जमिनीच्या संदर्भातलं एकदम साधं काम आहे. त्याचं सात बारा नोंदणीचं काम होतं. तिथला तलाठी त्यासाठी १५-१५ हजार रुपये मागतोय. त्याला आता संध्याकाळी ५ वाजता बोलवलंय. त्याचा बंदोबस्तच करतो,’ अशा रोखठोक शैलीत अजित पवार सभेत बोलले.

अजित पवार भ्रष्ट तलाठ्याला धडा शिकवत असल्याची भाषा करत असताना एक पत्रकार उभा राहिला. तो पत्रकार ‘बातमी’ मिळवण्यासाठीच उभा राहिल्याचा अजित पवारांचा समज झाला आणि अफलातून किस्सा घडला. तो बघ उठला लगेच बटण दाबायला, असं अजित पवार त्या पत्रकाराला उद्देशून म्हणाले. ‘आता ब्रेकिंग न्यूज नको दाखवायला, अजित पवार असं म्हणला. अरे तुझा धंदा चालू राहील आणि आमची वाट लागायची. मला फक्त इतकंच सांगायचं आहे की मी माझ्या घरात बोलतोय. तू बस ना जागेवर. गंमतीचा भाग जाऊ द्या,’ असं अजित पवार म्हणाले आणि सभास्थळी एकच हशा पिकला.
Santosh Deshmukh Murder Case: देशमुख हत्या प्रकरणात नवी थिअरी समोर; चाटे, केदारचा वेगळाच जबाब; सुग्रीव कराडचं नाव घेतलं
‘आम्ही त्यांना (अधिकाऱ्यांना) सगळ्या सुविधा देतो. अधिकारी म्हणून त्यांना इथे येताना त्यांना एका नव्या पैशाचा खर्च येत नाही. त्यांना सातवं वेतन देतो. लवकरच आठव्या वेतन आयोगानुसार त्यांना पगार द्यावा लागणार आहे. मग इतकं सगळं मिळत असताना तुम्ही कशासाठी पैशांची मागणी करता? असले प्रकार मी अजिबात खपवून घेणार नाही. तुम्ही कोणाच्याही वशिल्यानं इथं आला असलात तर मला त्याच्याशी काही देणंघेणं नाही,’ असं अजित पवार रोखठोकपणे म्हणाले.