पैसे घ्या पण गावात विकास कामे करा अशी मागणी करत नांदेड दक्षिण मतदार संघातील इंजेगाव ग्राम पंचायतीच्या महिला सरपंचाने गळ्यात शंभर रुपयांच्या नोटांचा हार घालून अनोखे आंदोलन केले. महिला सरपंच मुक्ताई पंचलिंगे यांनी गुरुवारी जिल्हा परिषद कार्यालया समोर हे अनोखे आंदोलन करून सर्वांचे लक्ष वेधले. इंजेगाव हे शिवसेना शिंदे गटाचे आमदार आनंद बोढारकर यांच्या नांदेड दक्षिण मतदार संघात येतो. मात्र या गावाचा म्हणावा तसा विकास झाला नाहीये. त्यामुळे स्मशानभूमी देण्यात यावी, स्थगिती दिलेल्या पाणी पूरवठा कामाला मंजुरी देण्यात यावी, गावात अंगणवाडीसाठी इमारत उभारण्यात यावी यासह इतर मागण्यासाठी महिला सरपंचाने हे आंदोलन केले. जिल्हा परिषदेचे अधिकारी मनमानी कारोभार चालवत असल्याचा आरोप महिलेने केला आहे. दरम्यान या आंदोलनाने सर्वांचे लक्ष वेधले होते.