शहादा तालुका लोणखेडा येथील नंदलाल यशवंत शिरसाट (वय ३१) हे भारतीय स्थलसेनेत शिपाई म्हणून कार्यरत होते. ते जम्मू येथील नवी ड्युटी ज्वाईन करण्यासाठी जाणार होते. तत्पूर्वी ते एक महिन्याची सुटी घेऊन गावाकडे आले होते. 2017 मध्ये त्यांचे लग्न पारोळा तालुक्यातील मोरफळ येथील माधुरी यांच्यासोबत झाले होते.

मोरफळ येथे सालीचा हळदीचा कार्यक्रम असल्याने नंदलाल शिरसाट हे लोणखेडा येथून मोरफळ जाण्यासाठी दुचाकी ( क्र. एम.एच.३९ ए.एफ.९५९२) 18 मार्च रोजी दुपारी जात असताना शिंदखेडा येथे साईनगर, लक्ष्मी नारायण मंदिराजवळ हायवा गाडीत मागून धडकल्यामुळे जवानाचा जागीच मृत्यू झाल्याची दुर्दैवी घटना घडली आहे. घटनेमुळे त्यांच्या कुटुंबासह संपूर्ण लोणखेडा गावावर शोककळा पसरली. नंदलाल शिरसाठ यांच्या पश्चात वडील यशवंत शिरसाठ, आई मीनाबाई, पत्नी माधुरी, मुलगा खुशाल व भाऊ असा परिवार आहे.

दरम्यान, अपघात होण्याआधी ते आपल्या सासरी चालले होते, त्यावेळी त्यांच्या वाहनाला धडक बसली आणि या धडकेमध्ये त्यांच्या डोक्याला जबर मार बसल्याने त्यांचा उपचारावेळी मृत्यू झाला. या घटनेमुळे सर्वत्र हळहळ व्यक्त करण्यात येत असून नंदलाल यांच्या जाण्याने परिवाराला मोठा धक्का बसला आहे. आता ते सुट्टीनिमित्त घरी आले होते, होळीचा सण आपल्या घरच्यांसोबत त्यांनी साजरा केला. सुट्टीनंतर त्यांची ड्युटी जम्मू येथे होती, सुट्टीनंतर ते जाणार होते मात्र जाण्याआधी असं घडल्याने त्यांच्या कुटुंबावर दु:खाचा डोंगर कोसळला आहे. पाच वर्षांच्या मुलाचं आता पितृछत्र हरवलं असून धडक देणाऱ्या वाहन चालकाविरोधात गुन्हा दाखल केला गेला आहे.