हिंसाचाराचा व्हिडीओ समोर

या घटनेचे अनेक व्हिडीओ आणि छायाचित्रे सोशल मीडियावर व्हायरल होत आहेत. या व्हिडिओमध्ये काही समाजकंटक हातात काठ्या आणि दगडं घेऊन वाहनांची तोडफोड करत असल्याचे स्पष्ट दिसत आहे. तसेच, काही गुन्हेगारांनी पेट्रोल बॉम्बचा वापर करत दुचाकींना आग लावल्याचेही समोर आले आहे. या घटनेमुळे परिसरात दहशतीचे वातावरण निर्माण झाले असून, स्थानिक नागरिक भयभीत झाले आहेत.

नागरिकांचे मोठे नुकसान

या हिंसाचारात अनेक वाहनांचे नुकसान झाले असून, काही दुकाने आणि घरांवरही हल्ला झाल्याचे समोर आले आहे. या घटनेमुळे व्यापाऱ्यांचे मोठ्या प्रमाणावर आर्थिक नुकसान झाले आहे. काही नागरिकांना किरकोळ दुखापती झाल्याचे वृत्त आहे. जिल्हा प्रशासनाकडून नुकसानीची पाहणी सुरू असून, तोडफोड झालेल्या वाहनांचे आणि इतर मालमत्तेचे पंचनामे करण्यात येत आहेत. प्रशासनाने नुकसान भरपाई संदर्भात लवकरच निर्णय घेण्याचे संकेत दिले आहेत.

पोलीस प्रशासन सतर्क

घटनेची माहिती मिळताच पोलिसांनी तातडीने घटनास्थळी धाव घेतली आणि परिस्थिती नियंत्रणात आणण्यासाठी प्रयत्न केले. नागपूर पोलिसांनी परिसरात मोठ्या प्रमाणावर बंदोबस्त तैनात केला असून पुढील कोणताही अनुचित प्रकार घडू नये, यासाठी संचारबंदी लावण्याचा निर्णय घेतला आहे. नागपूरचे पोलीस आयुक्तांनी याप्रकरणी कठोर कारवाईचे आश्वासन दिले आहे.
Nagpur Violence News: नागपुरात हिंसाचार, शहरात तणावपूर्ण शांतता, १० पोलीस ठाण्यांच्या हद्दीत संचारबंदी, ८० जण अटकेत
या हिंसाचाराच्या पार्श्वभूमीवर नागपूर प्रशासन आणि स्थानिक नेत्यांनी नागरिकांना संयम बाळगण्याचे आणि सामाजिक सलोखा राखण्याचे आवाहन केले आहे. सोशल मीडियावर कोणत्याही अफवांवर विश्वास ठेवू नये, असेही प्रशासनाने सांगितले आहे. सध्या पोलिसांनी परिस्थिती नियंत्रणात आणली असली तरी, या प्रकरणाच्या चौकशीसाठी विशेष पथक नेमण्यात आले आहे. नागपूरकरांना शांतता राखण्याचे आवाहन करण्यात आले आहे.