पोलिसांनी परिस्थिती नियंत्रणात आणण्यासाठी अश्रूधुरांच्या नळकांड्या फोडल्या आहेत. पण दगडफेक करणारे तरुण शांत होताना दिसत नाहीत. त्यांच्याकडून प्रचंड दगडफेक केली जात आहे. या दगडफेकीत अनेक पोलीस कर्मचारी जखमी झाले आहेत. तसेच आग विझवण्यासाठी दाखल झालेले अग्निशामक दलाचे जवान यांच्यावरही जोरदार दगडफेक करण्यात आली. यावेळी जखमी झालेल्या अग्निशामक दलाच्या जवानांनी प्रतिक्रिया दिली. “आंदोलक दगड, चाकू फेकून मारत आहेत, अशी प्रतिक्रिया आग विझवायला गेलेल्या अग्निशामक दलाच्या जवानांनी दिली. आम्ही आग विजवत असताना दगड लागला. ते दगड, चाकू, तलवारी डायरेक्ट मारुन फेकत आहेत. जे हातात येईल ते मारुन फेकत आहेत. दगड जास्त फेकत आहेत. आम्ही आग विझवत होतो. सर्व पोलीसवाले मागे होते. आमच्यावर डायरेक्ट दगडफेक केली”, अशी प्रतिक्रिया अग्निशामक दलाच्या जवानांनी दिली.

देवेंद्र फडणवीस यांचं नागरिकांना शांततेचं आवाहन

मुख्यमंत्री देवेंद्र फडणवीस यांनी या घटनेवर प्रतिक्रिया दिली आहे. नागपुरातील महाल परिसरात दगडफेक आणि तणावपूर्ण स्थिती निर्माण झाल्यावर पोलीस प्रशासन हातळत आहे. या परिस्थितीत नागरिकांनी प्रशासनाला संपूर्ण सहकार्य करावे, असं मुख्यमंत्री देवेंद्र फडणवीस यांनी आवाहन केलं आहे. आपण सातत्याने पोलीस प्रशासनाच्या संपर्कात असून त्यांना नागरिकांनी सहकार्य करावं, असं देवेंद्र फडणवीस म्हणाले आहेत. नागपूर हे शांतताप्रिय आणि एकमेकांच्या सुख-दु:खात सहभागी होणारे शहर आहे. अशावेळी कोणत्याही अफवांवर विश्वास ठेवू नका आणि प्रशासनाला संपूर्ण सहकार्य करा, असं आवाहनही मुख्यमंत्री देवेंद्र फडणवीस यांनी केलं आहे.