मिळालेल्या माहितीनुसार, १५ मार्च २०२४ पासून पुण्यात दुधाच्या दरात प्रति लिटर २ रुपयांची वाढ होणार आहे. बुधवार, १२ मार्च रोजी पुणे जिल्हा सहकारी दूध उत्पादक सोसायटी, म्हणजेच कात्रज डेअरी येथे झालेल्या दूध उत्पादक आणि प्रक्रिया कल्याणकारी संघटनेच्या बैठकीत हा निर्णय एकमताने घेण्यात आला. संघटनेचे अध्यक्ष गोपाळराव म्हस्के यांच्या अध्यक्षतेखाली झालेल्या या बैठकीला मानद सचिव प्रकाश कुटवाल, संगमनेर दूध संघाचे अध्यक्ष रणजितसिंह देशमुख, दुग्ध उद्योग तज्ञ श्रीपाद चितळे आणि पुणे जिल्हा दूध संघाचे अध्यक्ष स्वप्नील धामढेरे उपस्थित होते.

दरम्यान, या बैठकीत पनीरमधील भेसळीबद्दलही चर्चा करण्यात आली. या समस्येवर मात करण्यासाठी जनजागृती मोहिमांचे महत्त्व सदस्यांनी अधोरेखित केले. आणि दुग्ध उत्पादक शेतकऱ्यांना प्रलंबित अनुदाने जलदगतीने मिळावीत यासाठी सरकारशी संपर्क साधण्याचा निर्णय घेतला. याव्यतिरिक्त, असोसिएशनने दूध भेसळीविरुद्ध कठोर कारवाईची मागणी करण्यासाठी अन्न आणि औषध प्रशासन (FDA) आणि दुग्ध विकास मंत्री यांच्या अधिकाऱ्यांची भेट घेण्याची योजना आखली आहे. बनावट पनीरच्या मुद्दाकडे भाजपचे आमदार विक्रमसिंह पाचपुते यांनी लक्ष वेधलं होतं. बनावट पनीर घेऊनच त्यांनी विधीमंडळात प्रवेश केला होता. सध्या विक्री होत असलेल्या पनीरपैकी ६० ते ७० टक्के पनीर बनावट असल्याचा आरोपही त्यांनी त्यावेळी केला. या आरोपांची गंभीर दखल घेत सरकारनं बनावट पनीर रोखण्यासाठी कारवाई करण्याचे आदेश दिले आहेत.

नवीन दुधाचे दर:
गाईचे दूध: रु.५६-रु.५८ प्रति लिटर (रु.५४-रु.५६ वरून वाढलेले)
म्हशीचे दूध: रु.७२-रु.७४ प्रति लिटर (रु.७०-रु.७२ वरून वाढलेले)