धनकवडी येथील एका आयुर्वेदिक उपचार केंद्रात (आयुर्वेदिक मसाज सेंटर) काम करणाऱ्या महिलेला आरोपीने अर्धनग्न होण्यास भाग पाडले आहे. “मी एका पक्षाचा अध्यक्ष आहे. मी सांगतो तसे जर तू उपचार केले नाहीस, तर तुझे आयुर्वेदिक केंद्र बंद करून टाकेन,” अशी धमकी देत जबरदस्ती उपचार करून घेतला. दरम्यान, त्याच्यासोबत असलेल्या मित्राने उपचार सुरू असतानाच गुपचूप व्हिडिओ रेकॉर्ड केला. त्यानंतर, आरोपीने आपल्या साथीदारांसह दुकानात घुसून महिलेची आर्थिक लूट केल्याची धक्कादायक घटना समोर आली आहे. या प्रकरणी सहकारनगर पोलिस ठाण्यात गुन्हा दाखल करण्यात आला असून, आरोपींना अटक करण्यात आली आहे.
Latur: बीडनंतर लातूर? निर्वस्त्र केलं, डोक्यात लाथ, काठीने पाठ फोडली; पाच जणांकडून तरुणाला मारहाण, थरकाप उडवणारा VIDEO

अटक आरोपींची नावे –

• रोहित गुरुदत्त बाघमारे (वय २९ वर्षे) – रा. यशोदीप चौक, चौधरी बिल्डिंग, वारजे माळवाडी, पुणे.
• शुभम चांगदेव धनवटे (वय २० वर्षे) – रा. गणराज कॉम्प्लेक्स, फ्लॅट नं. १०९, आहिरे गेट, उत्तमनगर, पुणे.
• राहुल ज्ञानेश्वर वाघमारे (वय ३६ वर्षे) – रा. एसआरए बिल्डिंग, मामासाहेब मोहळ शाळेसमोर, केळेवाडी, पौड रोड, कोथरूड, पुणे.

आरोपींवर आधीचं गुन्हे दाखल

• रोहित बाघमारे याच्याविरोधात वारजे पोलीस ठाण्यात भादंवि कलम ३५४ अंतर्गत गुन्हा (गु.र.नं. ५०७/२०२१) दाखल आहे.
• रोहित बाघमारे आणि शुभम धनवटे यांच्याविरोधात अंभोरा पोलीस ठाण्यात भादंवि कलम ३०४(४) अंतर्गत गुन्हा (गु.र.नं. २०८/२०२४) दाखल आहे.
• पाथर्डी पोलीस ठाण्यात भादंवि कलम ३०९(६) अंतर्गत गुन्हा (गु.र.नं. ८५०/२०२४) दाखल असून, या प्रकरणात ते फरार आरोपी होते.

नेमकं काय घडलं?

३ मार्च रोजी दुपारी १ वाजण्याच्या सुमारास आरोपी रोहित बाघमारे धनकवडी येथील आयुर्वेदिक उपचार केंद्रात आला. त्याने उपचाराची माहिती विचारली आणि एका तासासाठी उपचार घ्यायचे असल्याचे सांगितले. उपचारादरम्यान, त्याने वापरण्यात येणाऱ्या तेलाची चौकशी केली आणि तिळाचे तेल वापरण्यास सांगितले.

उपचार सुरू असताना, आरोपीने पीडित महिलेस जबरदस्तीने तिचे कपडे काढण्यास भाग पाडले. त्यावेळी त्याने धमकी दिली की, “मी एका पक्षाचा अध्यक्ष आहे. जर मी सांगतो तसे उपचार केले नाहीस, तर तुझे आयुर्वेदिक उपचार केंद्र बंद करून टाकेन.” पीडितेच्या इच्छेविरुद्ध आरोपीने जबरदस्तीने उपचार करून घेतला.

थोड्या वेळाने आरोपीच्या इतर २-३ साथीदारांनीही उपचार केंद्रात प्रवेश केला. त्यांनी पीडितेकडे २०,००० रुपये मागितले. त्यानंतर, उपचार करताना गुपचूप रेकॉर्ड केलेला व्हिडीओ सोशल मीडियावर व्हायरल करण्याची धमकी देत पैसे उकळण्याचा प्रयत्न केला. पीडितेने पैसे नाकारल्यानंतर, आरोपींनी काउंटरमधील ८०० रुपये जबरदस्तीने लुटून पळ काढला. या घटनेनंतर पोलिसांनी तातडीने गुन्हा दाखल करून आरोपींना अटक केली असून, पुढील तपास सुरू आहे.