गोवा महामार्गालगत असणाऱ्या दुरशेत फाटा रस्त्यालगत नदीच्या कडेला गेल्या तीन-चार दिवसांपासून एक मोठी बॅग पडलेली ग्रामस्थांना दिसली. मात्र, सुरुवातीला कोणीही तिच्याकडे विशेष लक्ष दिले नाही. नागरिकांना वाटले की कोणीतरी जुनी बॅग फेकून दिली असेल. मात्र, काही दिवसांनंतर बॅगमधून दुर्गंधी येऊ लागल्याने नागरिकांना संशय आल्याने तत्काळ ग्रामस्थांनी पेण पोलिसांना माहिती कळविली. माहिती मिळताच पेण पोलिस ठाण्याचे पोलीस निरीक्षक संदीप बागुल यांच्या नेतृत्वाखाली पथक दाखल होत त्यांनी आणि दुर्गंधी येणारी संशयास्पद बॅग उघडून पाहिली. सुटकेसमध्ये एका अज्ञात महिलेचा मृतदेह आढळून आला. या प्रकाराने उपस्थित नागरिकांसहित पोलीसही हादरले.

बाल गंगा परिसरात दोन ते तीन दिवसापासून परिसरात कुजलेला वास येत असल्याची माहिती सरपंच दशरथ गावंड, ग्रामस्थांनी आणि पोलीस पाटील यांना मिळाली. यावेळी पाहणी केली असता सदरच्या सुटकेची चेन थोडी उघडी होती आणि त्यामधून केस आणि केसांचा क्लिप दिसून आला आणि या घटनेचा उलगडा झाला.
Delhi News: फ्लॅटमध्ये २६ वर्षीय महिला डॉक्टरचा संशयास्पद मृत्यू, खोलीत बॉडी अन्…; पतीपासून वेगळी राहायची
सदर घटनेची माहिती पोलिस प्रशासनाला ग्रामस्थांनी दिली असता तात्काळ दूरशेत फाट्याजवळील रस्त्यावरील बॅग पाहिली असता एका अज्ञात महिलेचा मृतदेह सडलेल्या अवस्थेत आढळून आला आहे. सदर बॅगेत एका अज्ञात महिलेचा मृतदेह आढळून आल्याने एकच खळबळ उडाली. सदर मृतदेह पोलिसांनी अपघातग्रस्तांचे वाली कल्पेश ठाकूर यांच्या मदतीने रुग्णवाहिकेद्वारे उपजिल्हा रुग्णालय येथे ठेवण्यात आले असून याबाबत पोलिसांनी अज्ञात व्यक्तीविरोधात गुन्हा दाखल केला आहे.

या प्रकरणाचा अधिक तपास पोलिस उपधीक्षक गजानन टोम्पे यांच्या मार्गदर्शनाखाली पोलिस निरीक्षक संदीप बागुल सहाय्यक पोलिस निरीक्षक निलेश राजपूत करत आहेत. याबाबत अधिक माहिती अशी की दुरशेत फाट्याजवळ मागच्या चार-पाच महिन्यापूर्वी पुरुषाचा मृतदेह आणि त्यानंतर बंदुकीच्या काही गोळ्या याच ठिकाणी सापडण्याची घटना असल्याने येथील नागरिक भयभीत झाले आहे. प्राथमिक तपासात ही हत्या असल्याचा संशय व्यक्त केला जात आहे. मात्र, अद्याप कोणतीही अधिकृत माहिती हाती आलेली नाही. पोलिसांनी परिसरातील सीसीटीव्ही फूटेज तपासण्यास सुरुवात केली असून, मृत महिलेची ओळख पटवण्याचा प्रयत्न सुरू आहे.

या प्रकारामुळे दूरशेत आणि आसपासच्या गावांमध्ये भीतीचे वातावरण पसरले आहे. नागरिकांमध्ये या घटनेबद्दल मोठी चर्चा असून, पोलिसांनी आरोपीचा जलद शोध घ्यावा, अशी मागणी केली जात आहे. या घटनेचा अधिक तपास पेण पोलीस स्टेशनकडून सुरू असून, लवकरच या प्रकरणाचा खुलासा होण्याची शक्यता आहे.