या घटनेबद्दल मिळालेली माहिती अशी की, फिर्यादी मोहम्मद सलमान मोहम्मद रमजान खान (३३) हे नालासोपारा पूर्व येथील श्रीराम नगर येथे राहतात. त्यांना दोन मुली आहेत. त्यांची लहान मुलगी ही ५ वर्षांची आहे. त्यांची बहिण देखील त्यांच्या घरासमोरच रहाते. शनिवारी दुपारी कामावरून येताना त्यांनी आपल्या लहान मुलीला शाळेतून आणले. संध्याकाळी लहान मुलगी घराबाहेर खेळत होती. मात्र बराच वेळ झाला तरी ती परत न आल्याने तिचा सर्वत्र शोध सुरू केला. मुलगी कुठेच न सापडल्याने सर्व नातेवाईकांनी परिसरातील सीसीटीव्ही तपासले. एका कंपनीच्या सीसीटीव्ही कॅमेर्‍यात खान यांचा १३ वर्षांचा भाचा मुलीला घेऊन जाताना दिसला. त्याच्याकडे विचारपूस केली असता त्याने डोंगरावर खेळायला गेले असता दोन अज्ञात व्यक्तींनी तिला मारल्याचे सांगितले. घाबरलेले कुटुंबिय रात्री साडेअकरा वाजता पोलीस ठाण्यात आले. पोलिसांनी मध्यरात्री डोंगरपरिसरात तपास केला असता लहान मुलीचा मृतदेह आढळला.

पहाटे साडेचारच्या सुमारास पोलिसांना श्रीराम नगर टेकडीवर मुलीचा मृतदेह सापडला. दरम्यान, पोलिसांनी १३ वर्षांच्या तिच्या भावाला चौकशी करिता ताब्यात घेतले. पोलिसांनी सीसीटीव्हीच्या आधारे मुलाला प्रश्न विचारले. परंतु, सुरूवातीला त्याने पोलिसांची दिशाभूल करण्याचा प्रयत्न केला. मुलाच्या बोलण्यात संशय जाणवल्याने पोलिसांनी अधिक खोलात जाऊन चौकशी केली असता मुलाने आपला गुन्हा कबुल केला. आणि आपणच बहिणीला मारल्याचे पोलिसांना सांगितले.

कुटुंबातील प्रत्येकजण आपल्या मामेबहिणीचे जास्त लाड करायचे. त्यामुळे आपणच रागाच्या भरात तिला मारल्याचे त्याने पोलिसांना सांगितले. अल्पवयीन मुलाने दिलेल्या माहितीनुसार, हत्येपूर्वी त्याने ‘रामन राघवन २’ हा चित्रपट पाहिला होता. त्यानंतर, खेळण्याच्या बहाण्याने तो तिला, नालासोपारा पूर्व येथील श्रीरामनगर टेकडीवर घेऊन गेला. तिथे त्याने आधी ५ वर्षांच्या आपल्या मामेबहिणीचा गळा आवळला आणि त्यानंतर त्याने तिचा चेहरा दगडाने ठेचला. पोलिसांनी अल्पवयीन मुलाला ताब्यात घेतले असून, त्याला बाल न्याय मंडळासमोर हजर केले जाणार आहे. या प्रकरणाचा अधिक तपास पोलिस करत आहेत.