काय म्हणाल्या रक्षा खडसे?

केंद्रीय मंत्री रक्षा खडसे यांच्या मुलीची टवाळखोरांकडून छेड काढण्यात आल्यानंतर रक्षा खडसेंनी पहिली प्रतिक्रिया दिली आहे. ‘परवा रात्री मुलीने मला फोन केला आणि यात्रेत जायचं आहे असं सांगितलं. तिला मी गार्डला घेऊन जा असं सांगितलं. मात्र टवाळखोरांनी पाठलाग करुन त्यांच्या पाळण्यात जाऊन बसले, जबरदस्तीने शेजारी बसले, आमच्या लोकांनी मुलींना दुसरीकडे बसवलं, तिथेही ते गेले, व्हिडिओ काढले, माझ्या गार्डने त्यांचा मोबाईल घेतला, की काय व्हिडिओ काढले हे पाहण्यासाठी त्यावेळी व्हिडिओ कॉल कोणाला तरी केल्याचं लक्षात आलं. त्या टवाळखोरांनी गार्डसोबत धक्काबुक्की केली, मुलींसोबतही छेडछाड केली.’

‘आरोपी माझ्या किंवा कोणाच्याही जवळचा असेल शेवटी मुलींचा आणि महिलांचा इथे विषय आहे. माझ्या जरी जवळचा व्यक्ती असेल तर त्याच्यावर कारवाई झाली पाहिजे. कोणत्याही लोकप्रतिनिधीचा जवळचा असेल तरी त्याचा विचार न करता ज्याने गुन्हा केला आहे त्याच्यावर कारवाई झाली पाहिजे. कायदे आहेत, पण त्याच्यावर सतत अॅक्शन घेणे, त्याला कोर्टाच्या माध्यमातूनही जामीन मिळू नये अशी कठोर कारवाई होणं गरजेचं आहे.’

‘महत्त्वाची बाब म्हणजे पोलीस आमच्या सुरक्षेसाठी दिलेले असतात आणि कुटुंब म्हणून सुरक्षारक्षकाला मी त्यांच्यासोबत पाठवलं आहे, तर कोणाची हिम्मत होता कामा नये, मात्र ड्रेसमध्ये असताना पोलिसासमोर अशी गोष्ट घडते.’

दरम्यान, सुरक्षारक्षक सोबत असतानाही मुलीची छेड काढली गेली. रक्षा खडसेंनी गुजरातवरुन आल्यानंतर तक्रार दाखल केली. याप्रकरणी आता गुन्हा दाखल करण्यात आला आहे. ३५३ अंतर्गत आरोपींना अटक करता येत नाही, त्यामुळे चौकशी करुन त्यांना सोडलं, मात्र अद्याप आरोपींना अटक करण्यात आली नाही, अशी माहिती पोलिसांनी दिली आहे. टवाळखोरांवर पॉक्सोअंतर्गत गुन्हा दाखल करण्यात आला आहे. मंत्र्यांच्या मुली सुरक्षित नसतील तर सर्वसामान्यांचं काय होत असेल असा प्रश्न उपस्थित होत आहे.