शनिवारी दुपारी पल्लवी कोरटकर यांनी नागपूरमधील बेलतरोडी पोलीस ठाण्यात धाव घेत लेखी तक्रार दिली. त्यांच्या म्हणण्यानुसार, अज्ञात व्यक्तींनी त्यांना आणि त्यांच्या कुटुंबाला जीवे मारण्याची धमकी दिली आहे. विशेष म्हणजे, त्यांनी या प्रकरणासाठी थेट इतिहासकार इंद्रजित सावंत यांना जबाबदार धरले आहे.
Prashant Koratkar : प्रशांत कोरटकरला दिलासा नाहीच, जामीन अर्जासाठी नवी तारीख, कोर्टात काय घडलं?

कोरटकर फरार, पोलिसांचा शोध सुरू

प्रशांत कोरटकरवर इतिहासकार इंद्रजीत सावंत यांना धमकावल्याचा आरोप आहे. याशिवाय, त्यांनी छत्रपती शिवाजी महाराज आणि छत्रपती संभाजी महाराज यांच्याबाबत आक्षेपार्ह विधान केल्याचे समोर आले होते. यामुळे कोल्हापूर आणि नागपूर पोलिसांनी त्यांच्यावर गुन्हा दाखल केला आहे. मात्र, गुन्हा दाखल झाल्यापासूनच कोरटकर फरार आहेत. त्यांना पकडण्यासाठी पोलिसांनी विविध ठिकाणी शोध घेतला, परंतु त्याचा कुठेही ठावठिकाणा लागत नाही. त्यांच्या संभाव्य ठिकाणांची माहिती मिळवण्यासाठी पोलिसांनी त्यांच्या नातेवाईक आणि परिचितांचीही चौकशी केली आहे.

पत्नीला धमक्या, सावंत यांच्यावर आरोप

प्रशांत कोरटकरांच्या पत्नी पल्लवी कोरटकर यांनी शनिवारी दुपारी पोलिसांत फिर्याद दाखल केली. त्यांनी सांगितले की, त्यांना अज्ञात व्यक्तीकडून वारंवार धमकीचे फोन येत आहेत. या फोनमध्ये त्यांना आणि त्यांच्या कुटुंबाला मारण्याची धमकी दिली जात आहे. विशेष म्हणजे, या धमकीसाठी पल्लवी कोरटकर यांनी थेट इंद्रजित सावंत यांना जबाबदार धरले आहे. त्यांच्या तक्रारीनुसार, जर त्यांना किंवा त्यांच्या कुटुंबाला काही झाले, तर त्यास सावंत हे जबाबदार असतील.

कोरटकर निर्दोष असल्याचा दावा, पोलिस तपासात उलट निष्कर्ष

प्रशांत कोरटकर यांनी या प्रकरणात स्वतःला निर्दोष घोषित करत आपल्यावर खोटा आरोप झाल्याचा दावा केला होता. त्यांनी सांगितले होते की, त्यांच्या आवाजाशी छेडछाड करून कोणीतरी इंद्रजित सावंत यांना धमकी दिली आहे. मात्र, पोलिस तपासात हा दावा खोटा असल्याचे स्पष्ट झाले. पोलिसांनी कोरटकर यांच्या फोनचा कॉल डिटेल रेकॉर्ड (CDR) तपासला असता, धमकीचे फोन कोरटकर यांनीच केल्याचे सिद्ध झाले. त्यामुळे आता कोरटकर यांच्यावर कायदेशीर कारवाई होण्याची शक्यता अधिकच वाढली आहे.