डोणगाव पोलिस ठाण्यात एका आरोपीविरुद्ध गुन्हा दाखल होता. मेहकरच्या अतिरिक्त जिल्हा व सत्र न्यायालयात दोषारोपपत्र दाखल झाले. आरोपीला दाखल गुन्ह्यात शिक्षा होण्याकरिता न्यायालयासमोर बाजू मांडण्यासाठी सहायक सरकारी वकील जनार्दन मनोहर बोदडे (६१) यांनी या घटनेतील कैफियतदारास तीन लाख रुपयांची लाच मागितली. याविषयी २४ फेब्रुवारीलाच वाशीम येथील लाचलुचपत प्रतिबंधक विभागाकडे तक्रार करण्यात आली. त्याच दिवशी पथकाने पंचांसमक्ष पडताळणी केली. तडजोडीअंती २ लाख ५० हजार रुपये घेण्याचे ठरले. त्यातील पहिला हप्ता म्हणून १ लाख रुपये २८ फेब्रुवारीला द्यावेत, असे ठरले होते.
ठाकरे गटात खांदेपालट? संजय राऊतांची नाशिकच्या पदाधिकाऱ्यांशी चर्चा; पालिका निवडणुकीपूर्वी नवे चेहरे
एसीबीचे अमरावती परिक्षेत्राचे पोलिस अधीक्षक मारुती जगताप, अप्पर पोलिस अधीक्षक सचिंद्र शिंदे यांच्या मार्गदर्शनाखाली वाशीम एसीबीचे पोलिस निरीक्षक बालाजी तिप्पलवाड, विनोद मार्कंडे, आसिफ शेख, योगेश खोटे, रवींद्र घरत, मिलिंद चन्नकेशला यांनी या कारवाईत सहभाग घेतला.

तक्रार प्राप्त होताच तातडीने कारवाई सुरू करण्यात आली. पडताळणीत संमती दर्शविताच न्यायालयात सापळा रचण्यात आला. एक लाख रुपये घेताच बोदडे यांना अटक करण्यात आली. याप्रकरणी मेहकर पोलिसांत गुन्हा दाखल करण्यात आला.
महिलांना मोठा दिलासा! महामार्गावर आता प्रत्येक २५ किमीवर स्वच्छतागृह, बचत गटांना देखभालीची संधी
लाचखोर उपअभियंता जाळ्यात
भंडारा : जलशुद्धीकरणाच्या कामांचे बिल मंजूर करण्यासाठी ४० हजारांची लाच स्वीकारणाऱ्या प्रभारी उपअभियंत्याला भंडारा लाचलुचपत प्रतिबंधक विभागाने अटक केली. ही कारवाई शुक्रवारी जिल्हा परिषद आवारात करण्यात आली. सुहास पांडुरंग करंजेकर (५१) असे लाचखोर प्रभारी उपअभियंत्याचे नाव आहे. तो यांत्रिकी उपविभाग जिल्हा परिषद येथे कार्यरत आहे. यातील तक्रारदार हे कंत्राटदार आहेत. त्यांनी जलशुद्धीकरणासंदर्भातील चिखली आणि लेंडेझरी या दोन गावांतील कामे पूर्ण केली होती. सदर कामाचे बिल ९ लाख ८० हजार रुपये होते. ते बिल मंजूर होण्यासाठी कंत्राटदार यांनी दोन्ही ग्रामपंचायतचे प्रमाणपत्र, वर्कऑर्डर, कामाचे छायाचित्र व इतर कागदपत्रांसह करंजेकर याच्याकडे सादर केले होते. हे बिल मंजूर करण्यासाठी करंजेकर याने लाच मागितली होती.