काल घडलेल्या घटनेनंतर स्वारगेट आगारात मोठा पोलीस बंदोबस्त तैनात करण्यात आलेला आहे. मात्र तरीही गुन्हेगार बिनधास्तपणे वावरत आहेत. पोलिसांचा कोणताही दरारा स्वारगेट परिसरात जाणवत नाही. पोलिसांचा तगडा बंदोबस्त असताना एसटी महामंडळातील एका वाहकाची बॅग चोरीला गेली आहे. त्यामध्ये ३० हजार रुपयांची रोख रक्कम होती. पैसे असलेली बॅग चोरीला गेल्यानं महिला कंडक्टर सध्या तणावात आहे.
Pune Crime Swargate Depot: एसटी डेपोत अत्याचार, आरोपी फरार; घटनास्थळी पोहोचल्यावर पोलिसांना समजला धक्कादायक प्रकार
काल घडलेल्या घटनेनंतर स्वारगेट एसटी आगारात मोठ्या संख्येनं पोलीस कर्मचारी उपस्थित आहेत. त्यांचा तगडा बंदोबस्त पाहायला मिळत आहे. पण याही परिस्थितीत चोरटे त्यांचा कार्यभाग साधत आहेत. साताऱ्याहून स्वारगेटला गाडी घेऊन आलेल्या सुप्रिया फाळके या महिला कंडक्टरची बॅग आगरातून चोरीला गेली. बॅग सापडत नसल्यानं त्या हवालदिल झाल्या आहेत.

सकाळी साडे आठच्या सुमारास फाळके एसटी घेऊन साताऱ्याहून स्वारगेटला आल्या. त्यावेळी आगारात मोठा पोलीस बंदोबस्त होता. ‘मी स्वारगेटला पोहोचले, तेव्हा बॅग माझ्याकडेच होती. त्यात पैसे आणि ट्रे बॉक्स होता. माझा ट्रे बॉक्स ३० हजारांचा आहे. मी इथे आले तेव्हा ट्रे बॉक्स होता. तो गाडीतच होता. मी वॉशरुमला गेले. परत आले तेव्हा बॅगच गायब होती,’ असा घटनाक्रम फाळकेंनी कथन केला.
Pune Crime Swargate Depot: स्वारगेट डेपोतील CCTVमध्ये भलतीच दृश्यं कैद; आरोपी गेला कुठे? कॅमेऱ्यात काय दिसलं?
याआधी माझ्यासोबत कधीच असा प्रकार घडलेला नाही. या घटनेची माहिती मी अद्याप तरी एसटी महामंडळाच्या अधिकाऱ्यांना दिलेली नाही. घटनेची माहिती आगार प्रमुखांना देईन. सीसीटीव्हीत काही रेकॉर्ड झालं आहे का तेदेखील पाहू, असं फाळके यांनी सांगितलं. ३० हजारांची रोख रक्कम चोरीला गेल्यानं फाळके सध्या त्रस्त आहेत. त्यांच्या चेहऱ्यावर तणाव अगदी स्पष्ट दिसत होता. तगडा बंदोबस्त असूनही जर आगारात चोऱ्या होत असतील, तर पोलिसांचा धाक राहिला आहे का, असा प्रश्न या प्रकारामुळे उपस्थित झाला आहे.