शुक्रवारी कारमालक विशेष श्रीवास्तव हे त्यांच्या वाहनासह पारडी उड्डाणपुलावरून जात असताना पुलाच्या प्लास्टरचा मोठा भाग त्यांच्या गाडीवर कोसळला. या घटनेत त्यांच्या वाहनाचे अंदाजे एक ते दीड लाख रुपयांचे नुकसान झाले आहे. त्यामुळे त्यांनी वाठोडा पोलीस ठाण्यात तक्रार दाखल केली. पोलिसांनी घटनास्थळी पाहणी करून एनएचएआयच्या अधिकाऱ्यांना नोटीस बजावली आहे आणि याप्रकरणाचा अधिक तपास सुरू आहे.

गुरुवारी पारडी उड्डाणपूल वाहतुकीसाठी खुला करण्यात आला होता. उद्घाटन सोहळा आमदार कृष्णा खोपडे यांच्या हस्ते पार पडला. मात्र, अवघ्या २४ तासांतच पुलाच्या गुणवत्तेबाबत गंभीर प्रश्नचिन्ह उपस्थित झाले आहेत. या घटनेमुळे नागपूरमधील पायाभूत सुविधांच्या दर्जावर नागरिकांकडून तीव्र संताप व्यक्त केला जात आहे. काही दिवसांपूर्वी कामठी रोडवरील एका उड्डाणपुलाचा भाग कोसळला होता. तसेच, दीड महिन्यापूर्वी बुटीबोरी उड्डाणपूलही अशाच दुर्घटनेला सामोरा गेला होता. त्यामुळे शहरातील उड्डाणपुलांची गुणवत्ता तपासण्यासाठी ‘स्ट्रक्चरल ऑडिट’ करण्याची मागणी होत आहे.

पारडी उड्डाणपुलाच्या बांधकामाला तब्बल साडेनऊ वर्षे झाली असून, हे काम अनेक वेळा रखडले होते. अखेर पुलाचे काम पूर्ण झाल्यानंतर तो वाहतुकीसाठी खुला करण्यात आला. मात्र, या पुलाच्या प्लास्टर तुकड्यांच्या कोसळण्याच्या घटनेने नागपूरमधील पायाभूत विकासाच्या कामांवर गंभीर प्रश्न निर्माण झाले आहेत. संबंधित अधिकाऱ्यांवर कारवाई होणार का, याकडे आता नागपूरकरांचे लक्ष लागले आहे.