ठाकरे गटाच्या नेत्यांकडून नीलम गोऱ्हेंच्या वक्तव्याचा निषेध व्यक्त केला जातोय. त्यासोबत पुण्यात ठाकरे गटाच्या महिला पदाधिकारी थेट रस्त्यावर उतरल्या. “टायरवाल्या काकू तुमच्या काळ्या टायरचा जाहीर निषेध”, असं फलक घेऊन महिलांनी निदर्शने दिली. यावेळी महिला कार्यकर्त्यांकडून जोरदार घोषणाबाजी करण्यात आली.

ठाकरे गटाच्या महिला पदाधिकारी आणि कार्यकर्ते आज नीलम गोऱ्हे यांच्या पुण्यातील निवासस्थानाबाहेर एकत्र जमले. यावेळी महिलांनी नीलम गोऱ्हे यांच्याविरोधात प्रचंड घोषणाबाजी केली. यावेळी महिला कार्यकर्त्यांनी नीलम गोऱ्हे यांच्या पोस्टवर जोडो मारो आंदोलनही केलं. यावेळी आंदोलक महिलांनी डमी मर्सिडीज कार आंदोलनात आणली. यावेळी या महिलांना माध्यमांना प्रतिक्रिया दिली.

आंदोलक महिलांचं म्हणणं काय?

“आज या बाईची लायकी नसताना तिने आमच्या साहेबांबद्दल वक्तव्य केलं. या बाईला काय कमी पडलं होतं? तिला आमदारकी पाहिजे, उपसभापती पद पाहिजे, आज सगळं आमच्याकडून घेऊन आमच्याच साहेबांच्या विरोधात बोलली”, अशी टीका एका आंदोलक महिलेनी केली.

‘जेवढ्या मर्सिडीज दिल्या त्याच्या पावत्या सादर करा’

“नीलम गोऱ्हे ठाकरे गटात होत्या, बाळासाहेब ठाकरे हयात असल्यापासून त्यांना विविध पदे देण्यात आले होते. त्यांना आतापर्यंत 10 लाभाची पदे दिली. एवढी लाभाची पदे देवून सुद्धा त्यांनी शिंदे गटात प्रवेश केला. त्यांनी आजच्या मुलाखतीत एका पदासाठी दोन मर्सिडीज गाडी उद्धव ठाकरेंना द्यावी लागायची. मग त्यांनी आतापर्यंत जेवढ्या मर्सिडीज उद्धव ठाकरेंना दिल्या त्याच्या पावत्या सादर कराव्यात”, अशी प्रतिक्रिया दुसऱ्या एका महिलेने दिली.
‘जय भीम म्हटल्याने ‘अश्रूपात”,’मातोश्री’वरुन फोन, भेटायला बोलावलं अन्…., नीलम गोऱ्हेंनी सांगितला बाळासाहेब ठाकरे यांच्यासोबतचा किस्सा
“मी त्यांना आवाहन करते की, तुमच्याकडे 10 मर्सिडीज देण्याची ताकद आहे तुमच्यामागे ईडीची चौकशी लावली पाहिजे. तुमच्याकडे एवढा पैसा आला कुठून? उद्धव ठाकरेंना एवढ्या मर्सिडीज दिल्या असत्या तर त्यांनी त्या गाड्यांचं शोरुम काढलं असतं. नीलम ताईंनी बोलताना भान ठेवायला हवं होतं. खाल्ल्या अन्नाला जागायला हवं होतं. उद्धव ठाकरे यांच्याबद्दल बोलताना विचार करायला हवा होता”, अशा शब्दांत महिला कार्यकर्त्याने नीलम गोऱ्हे यांच्यावर टीका केली.