कोल्हापुरात शिवसेना उद्धव बाळासाहेब ठाकरे पक्षाकडून कर्नाटक सरकार आणि कन्नड रक्षक वेदिका संघटना यांच्या विरोधात जोरदार आंदोलन करण्यात आलं. शुक्रवारी २१ फेब्रुवारीला कर्नाटकातील चित्रदुर्ग येथे कन्नड संघटनांनी महाराष्ट्र राज्य परिवहन महामंडळाच्या बसला काळं फासून ड्रायव्हरला देखील मारहाण केल्याची घटना घडली होती. यानंतर कोल्हापुरात शिवसेनेचे ठाकरे गटाचे सहसंपर्क प्रमुख विजय देवणे यांच्या नेतृत्वाखाली कोल्हापूरच्या मध्यवर्ती बस स्थानकाबाहेर जोरदार आंदोलन झालं. दरम्यान यानंतर मारहाण झालेले चालक आणि वाहक आज शनिवारी कोल्हापुरातील विभागीय कार्यालयात दाखल झाले. कन्नड रक्षक वेदिकेच्या गुंडांना एकट्याने सामोरं जात त्याचसह प्रवाशांना सुद्धा सुरक्षित ठेवल्याने शिवसेना ठाकरेच्या वतीने त्यांचा फेटा बांधून व हार घालून सत्कार करण्यात आला. यावेळी चालक भास्कर जाधव आणि वाहक प्रशांत थोरात यांनी घडलेली घटना सांगितली.