पुण्यातील लक्ष्मी नारायण चौकातून कर्नाटकला जाणाऱ्या बसेस सुटतात. शिवसैनिकांनी तिकडे जात कर्नाटकच्या बसेसना काळं फासलं. एसटीच्या चालक आणि वाहकांना कर्नाटकात मारहाण होत असताना मुख्यमंत्री गप्प का, असा सवाल शिवसैनिकांनी विचारला. आता फक्त बसेसला काळं फासलं आहे. हे प्रकार थांबले नाहीत तर मग पुण्यातून एकही गाडी कर्नाटकला जाऊ देणार नाही, असा इशाराच शिवसैनिकांनी दिला.

कर्नाटकात कन्नडिगांची मुजोरी थांबली नाही तर मग इकडेही त्यांच्या चालक, वाहनांना मारहाण होईल. आम्ही गाड्या फोडू. त्या पेटवून देऊ. हा छत्रपती शिवाजी महाराजांचा महाराष्ट्र आहे. आमच्या अस्मितेशी कोणी खेळू नये. अस्मितेला नख लावण्याचा प्रयत्न करु नये. आमचा इतिहास लक्षात ठेवावा आणि मराठी जनांचा सन्मान करावा. तर त्यांनाही इथे सन्मान मिळेल. अन्यथा आम्हाला त्यांच्यापेक्षा चांगलं मारता येतं, हे कन्नडिगांनी लक्षात ठेवावं, असा इशारा ठाकरेंच्या शिवसैनिकांकडून देण्यात आला.

मुख्यमंत्री देवेंद्र फडणवीस यांच्याकडेच गृहखातं आहे. ते आता गप्प का बसले आहेत? मराठी माणूस केवळ निवडणुकीत मतं मिळवण्यासाठीच यांना आठवतो का?, असे सवाल शिवसैनिकांनी विचारले. कर्नाटकातील मराठी माणसांविरुद्धची मुजोरी न थांबल्यास तिथून आलेली एकही गाडी आम्ही परत जाऊ नाही. आम्ही सगळ्या गाड्या फोडून जाळून टाकू, असा आक्रमक पवित्रा शिवसैनिकांनी घेतला.

कर्नाटकात काय घडलं?
काल कर्नाटकातील चित्रदुर्ग येथे कन्नड संघटनांनी महाराष्ट्र राज्य परिवहन महामंडळाच्या बसला काळं फासून चालकालादेखील मारहाण केल्याची घटना घडली होती. या गाडीचे वाहक आणि चालक प्रवाशांना सुरक्षित ठेवत त्यांना सामोरे गेले. गाडीमधील महिला आणि इतर सर्व प्रवाशांना सुरक्षितपणे तिथून माघारी आणले. या घटनेनंतर संताप व्यक्त केला जात आहे.