चंद्रशेखर बावनकुळे यांच्या निवासस्थानी भाजप आमदार सुरेश धस आणि धनंजय मुंडे यांची 30 दिवसांपूर्वी भेट झाली होती. स्वत: चंद्रशेखर बावनकुळे यांनी माध्यमांना माहिती दिली. दोन्ही नेत्यांमध्ये तब्बल 4 तास चर्चा झाल्याचं बावनकुळे म्हणाले होते. त्यामुळे सुरेश धस यांच्या भूमिकेबाबत संभ्रम निर्माण झाला. त्यांच्या भूमिकेवरुन विरोधकांकडून त्यांच्यावर सडकून टीका होत आहे. शिवसेना उद्धव बाळासाहेब ठाकरे पक्षाचे खासदार संजय राऊत यांनी तर बावनकुळे यांच्या घरी नक्की काय डील झाली? असा प्रश्नच ‘एक्स’वर उपस्थित केला आहे.

संजय राऊत काय म्हणाले?

“सरपंच संतोष देशमुख हत्या प्रकरणात आमदार सुरेश धस यांच्यावर आता कोणीच विश्वास ठेवणार नाही. धस हे भाजपा परंपरेस जागले. वापरा आणि फेका. वापरा आणि सौदा करा. बावनकुळे यांच्या घरी नक्की काय डील झाली”, असा सवाल संजय राऊत यांनी आपल्या ट्विटमध्ये केला आहे. दरम्यान, सुरेश धस यांनी आज दुपारीच माध्यमांना प्रतिक्रिया देताना याबाबत खुलासा केला आहे.
’21 तारखेला पर्दाफाश करणार, 4 अधिकाऱ्यांची नावे सांगणार’, सुरेश धस यांचा मोठा इशारा, धनंजय मुंडे यांच्या अडचणी वाढणार?

धनंजय मुंडेंना दोनवेळा भेटलो, धस यांचा खुलासा काय?

सुरेश धस यांनी आज राज्याच्या पोलीस महासंचालक रश्मी शुक्ला यांची भेट घेतली. या भेटीनंतर त्यांनी माध्यमांना प्रतिक्रिया दिली. यावेळी त्यांनी पत्रकारांनी विचारलेल्या प्रश्नावर उत्तर देताना आपण धनंजय मुंडे यांना दोन वेळा भेटल्याचं स्पष्ट केलं. आपल्याला चंद्रशेखर बावनकुळे यांनी भेटीसाठी त्यांच्या घरी बोलावलं होतं. त्यामुळे आपण त्यांच्या भेटीसाठी गेलो होतो. तिथे धनंजय मुंडे देखील आले होते. त्यावेळी आमच्यात केवळ 20 मिनिटे चर्चा झाली होती. ही भेट 30 दिवसांपूर्वी झाली होती. यानंतर दोन दिवसांपूर्वी धनंजय मुंडे हे आजारी असल्याने माणुसकीच्या नात्याने त्यांना रुग्णालयात भेटायला गेलो होतो. पण या दोन गोष्टींची सांगड घालत कुणीतरी मुद्दाम आपली बदनामी केली. याबाबत आपण खुलासा करणार असून मुख्यमंत्री देवेंद्र फडणवीस यांच्याकडे तक्रार करणार असल्याचं सुरेश धस म्हणाले आहेत.