तानाजी सावंत यांनी त्यांचा मुलगा ऋषिराजला पुण्यात परत आणण्यासाठी त्यांचं राजकीय वजन वापरलं. हा संपूर्ण घटनाक्रम मोठा रंजक आहे. ऋषिराजनं मित्रांसोबत बँकॉकला जाण्याचा प्लान केला. त्यासाठी त्यानं चार्टर्ड प्लेनचं बुकिंग केलं. विमानाच्या बुकिंगसाठी ग्लोबल हँडलिंग सर्व्हिसेसला ६८ लाख रुपये मोजले. ऋषिराज काही दिवसांपूर्वीच दुबईहून परतला होता.
लेक मित्रांसह गेलेल्याची कल्पना, तरी सावंतांनी अपहरणाची तक्रार का दिली? आतली बातमी समोर आली
ऋषिराजच्या बँकॉक ट्रिपला वडील तानाजी सावंत आणि ऋषिराजच्या पत्नीचा विरोध होता. पण कुटुंबाचा विरोध झुगारुन ऋषिराज बँकॉकसाठी रवाना झाला. पुण्याच्या लोहगाव विमानतळावरुन संध्याकाळी सव्वाचारच्या सुमारास विमानानं उड्डाण केलं. विमान रोखण्यासाठी तानाजी सावंत यांनी मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्याशी संपर्क साधला. पण त्या दोघांकडूनही प्रतिसाद मिळाला नाही.

यानंतर तानाजी सावंत यांनी भाजप आमदार शंकर जगतापांकडे धाव घेतली. शंकर जगतापांमार्फत मुख्यमंत्र्यांशी संपर्क झाल्यानंतर वेगानं सूत्रं हलली. मुख्यमंत्री कार्यालयाकडून पुणे पोलीस, केंद्रीय नागरी उड्डाण राज्यमंत्री मुरलीधर मोहोळ यांना निरोप देण्यात आला. पोलिसांना कार्यवाही करता यावी यासाठी अपहरणाचा गुन्हा दाखल करण्यात आला. मोहोळ यांच्याकडून डीजीसीएला कार्यालयाला सूचना देण्यात आल्या.
माघारी फिरा! पायलटला सूचना; सावंतांच्या मुलाला परत आणण्यात बड्या नेत्याची महत्त्वाची भूमिका
चार्टर्ड प्लेनच्या वैमानिकाशी संपर्क होईपर्यंत विमान बंगालच्या उपसागरापर्यंत पोहोचलं होतं. १८ जणांची आसन क्षमता असलेल्या विमानात केवळ ऋषिराज आणि त्याचे दोन मित्र होते. विमानानं तातडीनं माघारी आणण्याचे आदेश वैमानिकाला देण्यात आले. त्यानंतर त्यानं हवेतच यूटर्न घेतला. रात्री पावणे नऊच्या सुमारास विमान पुण्यात पुन्हा लँड झालं.