या प्रकरणाच्या तपासात मुंबई पोलिसांची ४ पथके गुंतली आहेत. घटनेबाबत मुलीने तिच्या पालकांना सांगितले की, एका अज्ञात व्यक्तीने तिला शाळेच्या आवारात एका निर्जन ठिकाणी नेले. आणि इंजेक्शन टोचले. घटनेचे गांभीर्य पाहून पालकांनी मुलीला तातडीने जवळच्या रुग्णालयात उपचारासाठी नेले. मुलीच्या घरच्यांनी लागलीच भांडुप पोलिसांना याबाबत माहीती दिली. भांडुप पोलिसांनी या प्रकरणाच्या चौकशीसाठी ४ पथके नियुक्त केली आहेत. शाळेच्या परिसरात बसवलेल्या सीसीटीव्हीची तपासणी करण्यात आली. या प्रकरणात पोलिसांना अद्याप असा कोणताही ठोस सुगावा लागलेला नाही.

सीसीटीव्ही कॅमेऱ्यांची तपासणी सुरू

या प्रकरणाबाबत पोलिस शाळेतील शिक्षक आणि कर्मचाऱ्यांचे जबाब नोंदवत आहेत. मुलीची रक्त तपासणी, एक्स-रे आणि इतर चाचण्या करण्यात आल्या असून, सर्व अहवाल सामान्य आले आहेत. अशी माहिती सूत्रांनी दिली आहे. सीसीटीव्हीमध्येही मुलगी शाळेच्या मैदानात खेळताना दिसत आहे. आणि नंतर ती तिच्या वर्गातील मैत्रिणींसोबत खेळताना दिसत आहे.

दरम्यान, पोलिसांनी माहिती दिली की मुलीला उपचारासाठी वाडिया रुग्णालयात दाखल करण्यात आले आहे. आणि मुलीच्या पालकांच्या तक्रारीनुसार भांडुप पोलिस ठाण्यात अज्ञात व्यक्तीविरुद्ध गुन्हा दाखल करण्यात आला आहे. पोलीस आरोपीचा शोध घेत आहेत. या प्रकारानंतर पालकांमध्ये भीतीचे वातावरण पसरले आहे. अधिकाऱ्यांनी नागरिकांना घाबरुन न जाता सतर्क राहण्याचे आवाहन केले आहे.