महिला व बाल विकास विभागाच्या योजनेसाठी; तसेच विक्रीसाठी मनाई असलेला तांदूळ व डाळींचा मोठा साठा करून, या तांदळावर सौम्य प्रक्रिया करून ‘बिर्याणी राइस’ नावाने चढ्या दरात विक्री करणाऱ्या टोळीला पोलिसांनी शनिवारी ताब्यात घेतले. या प्रकरणात पोलिसांनी दोन ते तीन हजार टन रेशनचा तांदळासह एफआयसीच्या पोत्यांसह शालेय पोषण आहारासाठी असलेले धान्य या कारवाईत आढळले आहे. या कारवाईत हे अन्नधान्य चढ्या भावात विक्री करणाऱ्या कंपनीच्या मालकासह, मॅनेजर आणि इतर काही कर्मचाऱ्यांनाही ताब्यात घेण्यात आले आहे, अशी प्राथमिक माहिती समोर आली आहे.

या प्रकरणात पोलिसांनी दिलेल्या माहितीनुसार, शहर विभाग एक पोलिस उपायुक्त यांच्या पथकाला करोडी भागातील एका कंपनीत रेशनसह विविध योजनेत गरिबांसाठी रेशन दुकानदाराच्या माध्यमातून विक्री करण्यासाठी आणलेला तांदूळ, दुसऱ्या पोत्यात टाकून खुल्या बाजारात ‘बिर्याणी राइस’ किंवा ‘दर्जेदार तांदूळ’ या नावाने विक्री होत असल्याची माहिती मिळाली. पोलिस उपायुक्त यांच्या पथकाने करोडी येथील या कंपनीवर छापा मारला.

पोलिसांनी या प्रकरणात कंपनीत कार्यरत असलेल्या मॅनेजरसह इतर कर्मचारी आणि ट्रकचालकांना ताब्यात घेतले. याशिवाय एफसीआय (फूड कॉर्पोरेशन ऑफ इंडिया) येथून ट्रकमध्ये माल या कंपनीत आणल्याचीही माहिती समोर आली. याशिवाय शालेय पोषण आहार योजनेतंर्गत संबंधितांना विक्री करण्यासाठी असलेल्या तांदळासह अन्य अन्नधान्यही आढळले आहे.

ही कारवाई झाल्यानंतर जिल्हा पुरवठा अधिकारी व अन्य अधिकाऱ्यांना पाचारण करण्यात आले होते. जिल्हा पुरवठा अधिकाऱ्यांनी पाहणी केली. पोलिस आणि जिल्हा पुरवठा अधिकारी यांच्या पाहणीत एफसीआयच्या सीलबंद पोत्यातील तांदूळ ट्रकमध्ये आढळल्याची माहिती समोर आली आहे. या कंपनीत दोन हजार ते तीन हजार टन अन्न धान्य असल्याचीही माहिती समोर आली आहे. या प्रकरणात रात्री उशिरापर्यंत दौलताबाद पोलिसांसह पथकाची कारवाई सुरू होती, अशीही माहिती समोर आली आहे. मात्र, याबाबत संबंधित पोलिस उपायुक्तांसह पोलिस ठाण्याच्या प्रभारी यांना संपर्क केला असता, त्यांनी कोणतीही माहिती दिली नाही.