वाढदिवशीच अपघात

ऑंचल रवींद्र शिंदे असे या तरुणीचे नाव असून २५ जानेवारीला तिचा वाढदिवस होता. त्यामुळे ती आणि तिची मैत्रीण केक आण्यासाठी गेल्या होत्या. मात्र पुन्हा घरी येत असताना तिचे वाहनवरील नियंत्रण सुटून तिचा अपघात झाला. त्यात ती गंभीर जखमी झाली होती. तिची प्रकृती खालवल्याने तिला पुण्यातील खाजगी रुग्णालयात दाखल करण्यात आले. मात्र तिच्यात तब्येतीत कोणतीही सुधारणा होत नव्हती. तिचा मेंदू कोणताही प्रतिसाद देत नव्हता. त्यानंतर डॉक्टरांनी तिच्या आईवडिलांशी मुलीच्या अवयव दानाबाबत चर्चा केली. आई वडिलांनी देखील सकारात्मक दिला. आपल्या मुलीमुळे कुणाला जीवदान मिळेल हा विचार करून त्यांनी आचलच्या अवयव दानाचा आदर्शवत असा निर्णय घेतला.

आई वडिलांचा आदर्श निर्णय

आई वडिलांच्या निर्णयानंतर विभागीय अवयव प्रत्यारोपण समितीकडून ऑंचल शिंदेच्या अवयवदानाची प्रक्रिया पार पाडली. या मुलीचे एक मूत्रपिंड मणिपाल रुग्णालयातील ३९ वर्षीय महिलेला, एक मूत्रपिंड व स्वादुपिंड ज्युपिटर रुग्णालयातील ३७ वर्षीय महिलेला तर यकृताचा एक भाग सह्याद्री रुग्णालयातील ५ वर्षीय मुलाला तर दुसरा भाग सह्याद्री रुग्णालयातील ४३ वर्षीय पुरुषाला आणि फुफ्फुसे डी.वाय. पाटील रुग्णालयातील ३३ वर्षीय पुरुषाला देण्यात आली. अशी माहिती विभागीय अवयव प्रत्यारोपण समितीच्या सचिव आरती गोखले यांनी दिली.
या घटनेमूळे ऑंचल जरी आपल्याजवळ नसली तरी सहा जणांच्या रूपाने ती या जगात असल्याची भावना तिच्या नातेवाईकांनी व्यक्त केली आहे.