महादेव बाबर हडपसर विधानसभा मतदारसंघाचे माजी आमदार आहेत. यंदाही ते विधानसभा निवडणूक लढण्यास उत्सुक होते. पण महाविकास आघाडीत ही जागा राष्ट्रवादी काँग्रेस शरदचंद्र पवार पक्षाला सुटली. त्यामुळे बाबरांची विधानसभा निवडणूक लढण्याची संधी हुकली. त्यानंतर बाबर नाराज झाले होते. विधानसभा निवडणुकीत ठाकरेंच्या पक्षाचं पानीपत झाल्यानंतर बाबर यांनी आता शिंदेंच्या शिवसेनेचा रस्ता धरला आहे.
शिंदेंमुळे सारेच ताटकळले; उद्धवसेनेच्या आमदारांकडून तक्रारींचा पाढा; पण चर्चा आदित्य ठाकरेंची
फेब्रुवारीच्या पहिल्या आठवड्यात २५ माजी सर्वपक्षीय नगरसेवकांना घेऊन शिंदेंच्या शिवसेनेत प्रवेश करणार असल्याचं बाबर यांनी सांगितलं. पुण्यात ठाकरेंना सातत्यानं धक्के बसत आहेत. आता बाबर यांनी पक्षाला जय महाराष्ट्र केल्यानं धक्क्यांची मालिका सुरुच आहे. आधी ५ माजी नगरसेवकांनी ठाकरेसेनेची साथ सोडली. त्यानंतर ३०० ते ४०० शाखाप्रमुख, विभागप्रमुखांनी पक्ष सोडला. यानंतर आता माजी आमदार महादेव बाबर यांनी शिवबंधन सोडलं आहे.

महादेव बाबर २००९ मध्ये शिवसेनेच्या तिकिटावर हडपसरमधून निवडून आले. पक्षफुटीनंतर ते ठाकरेंसोबत राहिले. त्यांना विधानसभा निवडणूक लढायची होती. पण जागावाटपात हडपसर मतदारसंघ शरद पवारांच्या पक्षाकडे गेला. प्रशांत जगताप यांनी अजित पवारांचे आमदार चेतन तुपे यांना चांगली लढत दिली. त्यांनी १ लाख २७ हजार ६८८ मतं घेतली. पण त्यांचा ७ हजार १२२ मतांनी पराभव झाला.
शिंदेंना घेरण्यासाठी भाजपचं तगडं प्लानिंग; नडणाऱ्या दादांवर जबाबदारी, आमदार पडू लागले भारी
महादेव बाबर यांची हडपसरमध्ये चांगली ताकद आहे. पुणे शहराच्या पूर्व भागात त्यांचं प्राबल्य आहे. पक्षफुटीनंतर जिल्ह्यातील काही जुनेजाणते शिवसैनिक ठाकरेंसोबत राहिले. महादेव बाबर त्यांच्यापैकीच एक होते. आता त्यांनी ठाकरेंच्या पक्षाला सोडचिठ्ठी दिली आहे. हा पक्षासाठी मोठा धक्का मानला जात आहे.