राजकीय वर्तुळातून मुंडेंच्या राजीनाम्याची मागणी जोर धरु लागली आहे. यातच धनंजय मुंडेंनी काल दिल्लीत माध्यमांशी संवाद साधताना राजीनाम्याचा निर्णय मुख्यमंत्री आणि उपमुख्यमंत्र्यांवर सोपवला होता. तर अजित दादांच्या नेतृत्वाखाली झालेल्या डीपीडीसी मध्ये देखील त्यांचा आक्रमक पवित्रा दिसून आला. त्यांनी पालकमंत्री काळातील हिशोब अजित दादांसमोर मांडत त्यांच्यावर सुरेश धस यांनी केलेल्या आरोपांनाही चोख प्रत्युत्तर दिले. या सर्व राजकीय गर्तेत त्यांनी अचानक भगवान गड गाठले आहे. आता रात्रभर त्यांचा मुक्काम गडावरच राहणार असून नामदेव महाराजांशी ते चर्चा करणार आहेत. सध्या मुंडे राजीनामा देण्याच्या तयारीत असल्याची चर्चा आहे. त्यामुळे भगवान गडावरील मुक्कामानंतर ते अंतिम निर्णय घेणार का? असा सवाल उपस्थित होत आहे.
राजीनाम्यासाठी दबाव, दिल्ली गाठताच धनुभाऊ स्पष्टच बोलले; दोषी वाटत असेल तर…
दरम्यान मुंडेंच्या दिल्ली दौऱ्यावेळी बुधवारी त्यांनी राजीनाम्याबद्दल भाष्य केले होते. ते म्हणाले होते की, ‘देशमुख हत्या प्रकरणात मुख्यमंत्र्‍यांना आणि उपमुख्यमंत्र्यांना मी कुठे दोषी वाटत असेल तर त्यांनी राजीनामा मागावा. मी राजीनामा देईल. मी दोषी आहे की नाही हे मुख्यमंत्री आणि उपमुख्यमंत्रीच सांगतील. तर सध्या ५१ दिवस ज्या पद्धतीने प्रकरणात ट्रायल सुरू आहे. यामध्ये टार्गेट मीच आहे.’

तर मुख्यमंत्री देवेंद्र फडणवीसांनाही दिल्लीमध्ये माध्यामांनी मुंडेंच्या राजीनाम्याचा प्रश्न विचारला असता त्यांनी मोजक्या शब्दांत प्रतिक्रिया दिली होती. ‘दिल्लीमध्ये आमची भेट झाली नाही. पण सकाळी कॅबिनेटमध्ये आमची भेट झाली. धनंजय मुंडे हे आमच्या मंत्रिमंडळातील सदस्य आहेत. त्यांना भेटण्याची काही चोरी नाही. आम्ही कुठल्याही कामासाठी भेटू शकतो आणि त्यांच्या राजीनाम्याबाबत अजितदादांनी भूमिका मांडली आहे. अजितदादांची भूमिका हीच आमची अधिकृत भूमिका असल्याचे म्हणत फडणवीसांनी विषय संपवला होता. मात्र भगवान गडावरील भेटीनंतर मुंडे निर्णय घेणार का? हे पाहणे महत्वाचे असणार आहे.