बीडमधील मस्साजोगचे सरपंच संतोष देशमुख हत्याप्रकरणात धनंजय मुंडे यांचे विश्वासू कार्यकर्ते वाल्मीक कराड यांचाही सहभाग असल्याचा आरोप विरोधकांकडून सातत्याने होत आहे. त्यातच सामाजिक कार्यकर्त्या अंजली दमानिया यांनीही अनेक कागदपत्रे समाजमाध्यमांवर पोस्ट करत कराड आणि मुंडे यांचे केवळ राजकीय नाही तर आर्थिक हितसंबंधही आहेत, असा सातत्याने दावा केला होता. तसेच, पवार यांनी वेळ दिली तर हे पुरावे त्यांना वैयक्तिकरित्या दाखवण्याचेही दमानिया यांनी स्पष्ट केले होते.

मंत्री मुंडे यांच्या राजीनाम्याविषयी प्रतिक्रिया देताना अजित पवार हे सातत्याने, मुंडे यांच्याविरोधात पुरावे सापडले तर नक्कीच कारवाई करण्यात येईल, असे सांगत आहेत. दमानिया यांनी एक्सवर पवार यांची इच्छा असल्यास कराड आणि मुंडे यांच्या संबंधांविषयीचे सर्व पुरावे सादर करु, असे पोस्ट केले होते. अखेर, सोमवारी सायंकाळी दमानिया यांना पवार यांनी देवगिरी या शासकीय निवासस्थानी आमंत्रित केले. दोघांमध्ये सुमारे २० ते २५ मिनिटे भेट झाली.
भोजपुरी, तमिळ, कन्नड भाषेत समालोचन होतं, मग मराठीत का नाही? हॉटस्टारनं मनसेला कारण सांगितलं
महाजेनकोशी व्यवहार
कराड आणि मुंडे यांच्या हितसंबंधांचे पुरावे पवार यांना दिल्याचे दमानिया यांनी भेटीनंतर स्पष्ट केले. मंत्री मुंडे हे पत्नी राजश्री मुंडे आणि वाल्मिक कराड सोबत कंपनीमध्ये संचालक पदावर असून त्यांचे महाजेनको या कंपनीशी आर्थिक व्यवहार आहेत, असा दावाही दमानिया यांनी केला. मुंडे हे एक लोकप्रतिनिधी म्हणून अशाप्रकारे लाभ मिळवू शकत नाही. संविधान आणि लोकप्रतिनिधी कायद्याचे हे उल्लंघन आहे, त्यामुळे याच धर्तीवर त्यांच्यावर फौजदारी कारवाई व्हायला हवी. तर दुसरीकडे निवडणूक आयोगानेही कारवाई करत त्यांची आमदारकी रद्द करायला हवी, असेही त्या म्हणाल्या. पुरावे पाहिल्यानंतर यातील अनेक बाबींविषयी पवार यांनाही माहिती नव्हती. ही सर्व माहिती आणि पुरावे मंगळवारी दुपारी १२ वाजता मुख्यमंत्र्यांची भेट घेऊन त्यांच्याशी याविषयी चर्चा करुन निर्णय घेऊ, असे पवारांनी सांगितल्याचा दावाही दमानिया यांनी केला.