रुग्णाला २९ डिसेंबर रोजी वायसीएम रुग्णालयात दाखल करण्यात आले होते. तर मृत्यू मंगळवारी रात्री (२१ जानेवारी) रोजी झाला. रुग्णाला ताप आणि दोन्ही पायांमधील शक्ती कमी झाल्याने १७ नोव्हेंबर रोजी पुण्यातील रूबी हॉल क्लिनिकमध्ये दाखल करण्यात आले होते. त्यानंतर दोन्ही पाय आणि हातांमधील कार्यक्षमता कमी झाली. तपासणीमध्ये १९ नोव्हेंबर रोजी रुग्णाला जीबीएसचे निदान झाले. यानंतर श्वसनाचा त्रास सुरू झाला.
पुण्यात गुइलेन-बॅरे सिंड्रोमचे नवे रुग्ण, १३ व्हेंटिलेटरवर; लक्षणं काय? नागरिकांना घाबरुन जाऊ नये, उपमुख्यमंत्र्यांचं आवाहन

गुंतागुंत निर्माण होऊन रुग्णाचा मृत्यू

या दरम्यान रुग्णाला २४ नोव्हेंबर रोजी पिंपरीतील डॉ. डी. वाय. पाटील रुग्णालयात दाखल करण्यात आले. रुग्णाला श्वसनाचा त्रास होत असल्याने व्हेंटिलेटर उपचार सुरू होते. बरेच दिवस व्हेंटिलेटरवर उपचार सुरू असल्याने रुग्णाला व्हेंटिलेटरशी संबंधित न्यूमोनिया (व्हीएपी) झाल्याचे डॉक्टरांनी सांगितले. उपचार सुरू असतानाच २९ डिसेंबर रोजी रुग्णााला वायसीएम रुग्णालयात दाखल करण्यात आले. वायसीएम रुग्णालयात २९ डिसेंबर ते २१ जानेवारी या कालावधीत रुग्ण वायसीएम रुग्णालयात दाखल होता.

न्यूमोनिया, उच्चरक्तदाब, रुग्णाचे वय, जीबीएसची पार्श्वभूमी या कारणांमुळे गुंतागुत निर्माण होऊन रुग्णाचा मृत्यू झाला, असे मेडिसीन विभागाचे प्रमुख डॉ. प्रवीण सोनी यांनी सांगितले. वायसीएमते अधिष्ठाता डॉ. राजेंद्र वाबळे यांनी देखील रुग्णाचा मृत्यू न्यूमोनियामुळेच झाल्याचे सांगितले.

मृत्यूचे कारण स्पष्ट व्हावे म्हणून समिती स्थापन करण्यात आली होती. समितीच्या अहवालानुसार या रुग्णाचा मृत्यू जीबीएसने झालेला नाही. न्यूमोनिया, श्वसनक्रिया बंद पडणे या कारणांमुळे झाला आहे, अशी माहिती पिंपरी-चिंचवड महापालिका, आरोग्य, वैद्यकीय अधिकारी, डॉ. लक्ष्मण गोफणे यांनी दिली आहे.