ट्रेनमध्ये प्रवास करणाऱ्या एका प्रवाशाने सांगितले की, हा अपघात दुपारी ३.३० ते ४ च्या दरम्यान झाला होता.
एका बोगीमध्ये आग लागल्याच्या अफवेनंतर काही लोकांनी ट्रेनमधून पटापट उड्या मारल्या. दरम्यान, समोरून कर्नाटक एक्स्प्रेस येत होती. काही कळायच्या आतच, वेगाने येणाऱ्या रेल्वेने अनेकांना चिरडले. समोरून येणाऱ्या कर्नाटक एक्स्प्रेसने हॉर्न वाजवला नाही, असा दावाही काही प्रत्यक्षदर्शींनी केला आहे. हॉर्न दिला असता तर प्रवाशी सावध झाले असते.

युपीच्या मुख्यमंत्र्यांनी रेल्वे अपघातावर शोक व्यक्त केला
उत्तर प्रदेशचे मुख्यमंत्री योगी आदित्यनाथ यांनी काल(२२ जानेवारी) झालेल्या पुष्पक ट्रेन दुर्घटनेवर शोक व्यक्त केला आहे. ते म्हणाले की, पुष्पक ट्रेन दुर्घटना अत्यंत दुःखद आणि हृदयद्रावक आहे. मी मृतांच्या कुटुंबियांप्रती संवेदना व्यक्त करतो. जखमींवर योग्य उपचार झाले पाहिजेत. ते लवकरात लवकर बरे व्हावे अशी माझी इच्छा आहे.

काय म्हणाले नाशिकचे विभागीय आयुक्त ?
नाशिकचे विभागीय आयुक्त प्रवीण गेडाम यांनी सांगितले की, पुष्पक एक्स्प्रेसचे प्रवासी रुळावर होते. तेवढ्यात कर्नाटक एक्स्प्रेस बाजूच्या ट्रॅकवरून जात असताना अनेक प्रवाशी त्याखाली चिरडले गेले. अतिरिक्त एसपी, एसपी, जिल्हाधिकारी आदी अधिकारी आम्ही घटनास्थळी पोहचून डीआरएम आणि रेल्वे अधिकाऱ्यांशी समन्वय साधला आहे. ८ रुग्णवाहिका घटनास्थळी दाखल झाल्या. अतिरिक्त रेल्वे रेस्क्यू व्हॅन आणि रेल्वे रुग्णवाहिका घटनास्थळी पाठवण्यात आल्या. प्रशासन सर्वतोपरी मदत करत आहे.