पुण्याचे पालकमंत्रिपद उपमुख्यमंत्री अजित पवार यांच्याकडे सोपवण्यात आले आहे. त्यामुळे पुण्याचे ‘दादा’ अजित पवार ठरले आहेत. चंद्रकांत पाटील यांच्याकडे सांगलीच्या पालकमंत्रिपदाची जबाबदारी देण्यात आली आहे. राज्य मंत्रिमंडळाच्या विस्तारानंतर पालकमंत्रिपदाच्या वाटपाबाबत उत्सुकता होती. मुख्यमंत्री देवेंद्र फडणवीस यांनी यावर तोडगा काढला आहे.
महायुती सरकारने अखेर बहुप्रतिक्षित पालकमंत्र्यांची; तसेच सह पालकमंत्रिपदाची यादी शनिवारी जाहीर केली. मुख्यमंत्री देवेंद्र फडणवीस यांच्याकडे गडचिरोलीचे, तर उपमुख्यमंत्री एकनाथ शिंदे यांच्याकडे ठाण्याचे पालकमंत्रिपद सोपविण्यात आले. उपमुख्यमंत्री अजित पवार यांच्याकडे अपेक्षेप्रमाणे पुण्याचे पालकमंत्रिपद सोपवियात आले. यात मंत्री धनंजय मुंडे यांचा पत्ता कट करण्यात आला असून, बीडच्या पालकमंत्रिपदाची जबाबदारीही त्यांच्याऐवजी अजित पवार यांच्याकडे देण्यात आली आहे. डिसेंबरच्या हिवाळी अधिवेशनाच्या शेवटी खाते वाटप जाहीर करण्यात आले होते. मात्र, त्यानंतर पालकमंत्रिपदाबाबत उत्सुकता होती.
अजित पवारांकडून पुणेकरांच्या अपेक्षा
- पुण्याचा रिंगरोड प्रकल्प वेगाने पूर्ण व्हावा
- पुरंदर विमानतळाला गती द्यावी
- पुणे शहारातील मेट्रो प्रकल्पांना गती
- सार्वजनिक वाहतूक व्यवस्था सक्षमीकरण
- पुण्याला पाणी कोटा वाढवून मिळावा
महायुतीमध्ये खातेवाटपाच्या तिढ्यानंतर पालकमंत्रिपदावरून वाद निर्माण झाला होता. मात्र, मुख्यमंत्री देवेंद्र फडणवीस यांनी यावर तोडगा काढला आहे. प्रजासत्ताक दिन जवळ येत असल्याने जिल्हा मुख्यालयात पालकमंत्र्यांच्या हस्ते ध्वजवंदन व्हावे यासाठी पालकमंत्रिपदाच्या वाटपाबाबत गेल्या काही दिवसांपासून महायुतीच्या नेत्यांच्या बैठका होत होत्या. राज्य मंत्रिमंडळाचा विस्तार होऊन महिना उलटून गेल्यानंतरही सरकारकडून पालकमंत्रिपदाचे वाटप अद्याप झाले नव्हते. यामुळे विरोधकांकडून या दिरंगाईबद्दल सरकारवर टीकाही केली जात होती.
महायुतीमधील तिन्ही पक्षांमध्ये पालकमंत्रिपदावरून रस्सीखेच सुरू होती. यात प्रामुख्याने रायगड, बीड, सातारा,जळगाव यासारख्या जिल्ह्यांच्या पालकमंत्रिपदावरून वाद होता. बीडमध्ये धनंजय मुंडे आणि पंकजा मुंडे हे दोन मंत्री पालकमंत्रिपदाचे प्रमुख दावेदार होते. मात्र, संतोष देशमुख हत्याप्रकरणी धनंजय मुंडे यांच्या मंत्रिपदाच्या राजीनाम्याची मागणी केली जात होती. सरपंच देशमुख हत्याप्रकरणी वाल्मिक कराडला पोलिसांनी अटक केली असून, या प्रकरणाचा राष्ट्रवादी काँग्रेसचे मंत्री धनंजय मुंडे यांना फटका बसला आहे. धनंजय मुंडे यांचा पत्ता कट करण्यात आला असून, पुण्यासोबतच बीडचे पालकमंत्रिपदही अजित पवार यांच्याकडे असेल. पंकजा मुंडे यांच्याकडे लातूरचे पालकमंत्रिपद देण्यात आले आहे.
सातारा जिल्ह्यात चार मंत्री असून, यात भाजपचे शिवेंद्रसिंहराजे भोसले, जयकुमार गोरे, शिवसेना शिंदे गटाचे शंभूराज देसाई आणि राष्ट्रवादी अजित पवार गटाचे मकरंद पाटील यांचा समावेश आहे. अखेर शिवसेनेचे शंभूराज देसाई यांच्याकडे साताऱ्याचे पालकमंत्रिपद सोपविण्यात आले.
लेखकाबद्दलहरिश मालुसरे महाराष्ट्र टाइम्स ऑनलाईन टीममध्ये सिनिअर डिजिटल कंटेंट प्रोड्युसर म्हणून कार्यरत. क्रीडा, राजकीय आणि क्राईम बातम्यांमध्ये विशेष आवड. झी 24 तास आणि टीव्ही9 मराठीसह पत्रकारिता क्षेत्रात 04 वर्षांचा अनुभव.… आणखी वाचा