यामुळे आष्टी तालुक्यातील वाहिरा भागातील नागरिकांमध्ये दहशतीचे वातावरण असून ते जीव मुठीत धरून जगत आहेत. याप्रकरणी पोलिसांनी चार संशयितांना ताब्यात घेतलं असून अधिक तपास सुरू आहे. पोलिसांकडून मिळालेल्या माहितीनुसार, अजय भोसले (वय वर्ष ३०) आणि भरत भोसले (वय वर्ष ३२) अशी मृत तरुणांची नावं आहेत. अजय आणि भरत यांचा त्यांच्या एका नातेवाइकासोबत जुना वाद होता आणि याच वादातून रात्री या दोघांची हत्या करण्यात आल्याची माहिती आहे.

दोघे भाऊ नगर हद्दीत हात वळण या मूळ गावचे आहेत. या गावापासून पाच किलोमीटर अंतरावर वाहिरा गावच्या परिसरात या दोघांची हत्या झाली. वादातून त्यांच्या नातेवाईकांनीच त्यांच्यावर चाकूने हल्ला केला. या जमावाच्या हल्ल्यात तिघा जणांच्या मारहाणीमध्ये दोघांचा जागीच मृत्यू झाला. यामुळे मोठी खळबळ माजली आहे. अजय आणि भरत या दोघांचे मृतदेह आष्टी उपजिल्हा रुग्णालयात आणण्यात आले असून पोस्टमार्टम करण्यात येणार असल्याचे पुढे आले आहे.

याप्रकरणी संशयित चार जणांना पोलिसांनी ताब्यात घेतले असून अंभोरा पोलीस या घटनेचा अधिक तपास करत आहेत. हा खून नेमका कधी कसा झाला, काय वाद होता याची पोलिसांकडून अधिक चौकशी करण्यात येत आहे. मात्र, या सगळ्या घटनेत जमावाने तिघांना मारहाण केली. मात्र यामध्ये दोघांचा जागीच मृत्यू झाला आणि एक जण गंभीरित्या जखमी झाला असून त्याच्यावर रुग्णालयात उपचार सुरू आहेत.